Pradstaŭnikam małoha biźniesu Biełarusi ź nievialikim abarotam pryjdziecca abo syści z rynku, abo abjadnacca, kab vyžyć. Takoje mierkavańnie vykazali pradprymalniki, jakija prysutničali na naradzie pa pytańniach rehulavańnia i raźvićcia asobnych vidaŭ pradprymalnickaj dziejnaści z udziełam Alaksandra Łukašenki.
Narada prajšła 17 sakavika ŭ handlova-zabaŭlalnym centry «Ekspabieł». Pierad jaje pačatkam Łukašenka abyšoŭ handlovyja šerahi, znajomiačysia z rabotaj indyvidualnych pradprymalnikaŭ (IP).
Jak raskazała ŭdzielnica sustrečy Ina Alaksiejenka — IP, jakaja handluje ŭ centry «Ekspabieł», — na naradzie prahučała prapanova pakinuć pradprymalnikam mahčymaść handlavać biez dakumientaŭ, ale pry hetym paetapna pavialičvać padatkovuju nahruzku dla IP. «Siońnia my płacim dvuchrazovy adziny padatak i dvuchrazovy PDK, zatym pakvartalny kaeficyjent budzie pavialičvacca na 0,5. Da 1 studzienia 2016 hoda atrymajecca kaeficyjent 4», — zaznačyła pradprymalnik.
«Nie dla ŭsich heta budzie dobra, — dadała jana. — Drobnamu biźniesu, u jakoha pa adnym punkcie pamieram try-čatyry kvadratnyja mietry, vyžyć budzie składana. Mnohija zakryjucca, ale inšaha vyjścia na siońnia niama».
Tym nie mienš Alaksiejenka dastatkova pazityŭna acaniła vyniki sustrečy. «My čakajem, što paśla sustrečy z prezidentam umovy pracy ablehčacca, bo da jaho ŭmiašańnia my visieli nad biezdańniu. Prezident prypyniŭ dziejańnie ŭkaza № 48 ab štrafnych sankcyjach, dziakujučy jamu nam praciahnuli prodaž reštkaŭ tavaru biez dakumientaŭ da 1 studzienia 2016 hoda», — zaznačyła pradprymalnica.
U svaju čarhu staršynia savieta rynku z Maładziečna Tamara Bahačova vykazała mierkavańnie, što «dzieviacimiesiačnaja pieradyška tolki častkova vyrašyć prablemy małoha biźniesu. Pradprymalniki, u jakich «zusim mała tavaru i niama hrošaj, zakryjucca», u toj čas jak «častka pojdzie na inšuju pracu, a niekatoryja, mahčyma, abjadnajuć svaje srodki i buduć pracavać razam».
Pavodle słoŭ Bahačovaj, pradstaŭniki bujnoha biźniesu na sustrečy byli suprać taho, kab IP dali čarhovuju adterminoŭku dla rasprodažu tavaraŭ biez supravadžalnych dakumientaŭ. «Ale my zmahli dakazać, što ŭ nas z bujnym biźniesam niama roŭnych abarotnych srodkaŭ, što drobny biźnies šyroka pradstaŭleny na pieryfieryi, dzie siońnia ŭsie znachodziacca ŭ ciažkich umovach vyžyvańnia», — raskazała IP.
Bahačova taksama paviedamiła, što raskazała prezidentu pra nizkuju kankurentazdolnaść biełaruskaha tavaru ź impartnym pa dyzajnie i canie. Naprykład, u Maskvie palito biełaruskaha pradpryjemstva «Elema» tańniejšaje, čym u Biełarusi.
«Prynamsi źjaviłasia nadzieja, što na 1 krasavika ŭ pradprymalnikaŭ budzie praca, — padkreśliła Bahačova, aceńvajučy vyniki narady. — My tym časam padumajem, što treba rabić dalej. Jašče treba razabracca ź siertyfikatami — hetaje rašeńnie treba pierahladać, kab my mahli atrymlivać hetyja dakumienty ŭ Rasii».
Pradstaŭniki bujnoha biźniesu na sustrečy z Łukašenkam havaryli pra nieabchodnaść pierachodu da cyvilizavanaha handlu. Tak, staršynia savieta dyrektaraŭ TAA «Tytuń-inviest» Pavieł Tapuzidzis zajaviŭ: «Adzinaje, što moža kiravać pracesami ŭ handli, — heta kankurencyja». «Nie pavinna być roznych sistem handlu. Pavinny być cyvilizavanyja mietady handlu, va ŭsich pavinny być dakumienty. Roŭnyja ŭmovy dla ŭsich, i jany pavinny pačacca jak maha raniej», — skazaŭ jon.
Biźniesmien zaznačyŭ, što nieabchodna davać i niejkija pasłableńni. «Moža być, lepš mienš padatkaŭ ź IP uziać, ale pryvučyć jaho handlavać pravilna», — skazaŭ Tapuzidzis.
Na jaho dumku, nieabchodna pakinuć ukaz prezidenta № 222 u sile, kab usie handlavali z dakumientami (zhodna z hetym ukazam z 1 sakavika 2015 hoda IP pavinny realizoŭvać uvieś tavar, jaki ŭvoziać, z supravadžalnymi dakumientami). «Padatkovyja pavieličeńni bolš niebiaśpiečnyja. Nie razumieju, čamu IP suprać hetaha nie pratestujuć», — zaznačyŭ biźniesmien. Tapuzidzis padkreśliŭ, što adzinaja vysnova, jakaja heta tłumačyć, — vialikaja marža na tavarach, što pradajucca biez dakumientaŭ.
Jašče adzin pradstaŭnik bujnoha biźniesu, hiendyrektar TAA SP «Santa Impeks Brest» Alaksandr Mašenski ličyć: dziaržava pavinna ŭstanavić praviły hulni, a biźnies, zychodziačy ź ich, — vybudoŭvać svaju stratehiju. «Pradprymalnictva pastupova vyšturchoŭvajuć na cyvilizavanyja rejki pracy. Dla pradprymalnictva važna z šeraj płoskaści pierachodzić u biełuju», — skazaŭ jon.
Jak paviedamlałasia raniej, pa vynikach narady mały biźnies atrymaŭ mahčymaść da 1 studzienia 2016 hoda realizoŭvać tavary lehprama, uviezienyja z krain Mytnaha sajuza, biez supravadžalnych dakumientaŭ.
