Miarkujecca, što da 2020 hoda stalica całkam piarojdzie na vodazabieśpiačeńnie z padziemnych krynic.
Pra heta paviedamiła na bryfinhu načalnik siektara dziaržaŭnaha vodnaha kadastru DU «Hidramiet» Alena Kvač. Bryfinh byŭ pryśviečany Suśvietnamu mietearałahičnamu dniu (adznačajecca 23 sakavika) i Suśvietnamu dniu vodnych resursaŭ (22 sakavika).
U ciapierašni čas try staličnyja rajony vykarystoŭvajuć vadu Vilejskaha vadaschovišča (Maskoŭski, Frunzienski i častkova Kastryčnicki). U damy žycharoŭ astatnich šaści rajonaŭ vada pastupaje z čystych padziemnych krynic.
«U ciapierašni čas pravodzicca paetapny pieravod horada na padziemnyja krynicy, — udakładniła Kvač. — Taksama adna ź istotnych prablem — heta jakaść pavierchnievych i padziemnych vod. Tut adbivajecca ŭpłyŭ skidaŭ ściokavych vod pramysłovych pradpryjemstvaŭ, haradoŭ, žyviołahadoŭčych kompleksaŭ, a taksama zabrudžvalnych rečyvaŭ, jakija pastupajuć z atmaśfiernymi apadkami ŭ reki».
Pavodle dadzienych Nacyjanalnaha statystyčnaha kamiteta Respubliki Biełaruś, u 2013 hodzie kala 75% uziataj z roznych krynic vady vykarystoŭvałasia na vytvorčyja patreby, 34,8% — na haspadarča-pitnyja, astatni abjom — na sielskahaspadarčaje vodazabieśpiačeńnie.
