«N.R.M. + Drum Extasy. Bolšoj, očień bolšoj konciert» – takija afišy visiać u mietro. Čamu afiša hurtu, jaki ličyŭsia łakamatyvam biełaruskamoŭnaj muzyki, zroblenaja pa-rasiejsku? I čamu ciapierašni N.R.M. vystupaje razam z hurtom Drum Ecstasy, lidar jakoha Filip Čmyr pisaŭ, što nienavidzić biełaruskuju movu? Pra heta my zapytalisia ŭ vakalista i hitarysta N.R.M Pita Paŭłava:
«Pracavać z kalektyvam Filipa Čmyra mnie padabajecca, — kaža Paŭłaŭ. — Ja ŭ kursie pra jaho vykazvańni na temu biełaruskaj movy. Ja dumaju, što heta – biazhłuzdyja vykazvańni emacyjnaha čałavieka. Jon časta vykazvajecca niepaśladoŭna. A ŭ Fejsbuku pravakacyjna. Što datyčyć afišy na ruskaj movie, to ja takoha rašeńnia nie prymaŭ. Kali ja jaje ŭbačyŭ, ja byŭ strašna ździŭleny i kryšačku razzłavany. Ale ja jaje ŭbačyŭ tolki tady, kali jana ŭžo źjaviłasia ŭ internecie. Mianiać ničoha ŭžo nie staŭ. Darečy, ja ničoha strašnaha ŭ hetaj afišy nie baču.
Ja vielmi ździŭleny kamientarami prafiesijnych biełarusaŭ, tamu što, pa ščyraści, hetyja ludzi daŭno nie byli na našych kancertach i nie słuchali našych piesień. I kamientary ludziej, jakija źviartajuć uvahu tolki na afišu, a nie na źmiest, vyhladajuć prosta niedarečnymi.
Ludzi prosta chočuć pahrecca ŭ pramianiach słavy N.R.M., padvysić svaje rejtynhi», — ličyć Paŭłaŭ.
Lavon Volski, jaki doŭhi čas byŭ frontmenam N.R.M., pra rasiejskamoŭnuju afišu havaryć nie zachacieŭ. Bo, jak paviedamiŭ Volski, dla jaho kamientavańnie dziejańniaŭ jaho byłych siabroŭ pa hurtu — absalutnaje tabu, i ni z kim ź ich jon nie maje znosin.
