U Biełarusi niama palityčnaha žyćcia. Lišni dokaz — nul reakcyi z boku partyjaŭ na faktyčnaje abviaščeńnie terminaŭ parlamenckaj kampanii.
Raniej kiraŭnica CVK ćvierdziła pra 12 kastryčnika jak aptymalnuju datu. Ale na sustrečy ź Jarmošynaj 28 studzienia Łukašenka raptam nahadaŭ, što mohuć być dva tury. Pad hetaj markaj vybary miarkujecca pryznačyć na kaniec vieraśnia.
Padajecca, što sapraŭdnym matyvam moža być žadańnie ssunuć kampaniju na leta dy samy pačatak vosieni. Leta — uvohule miortvy sezon dla palityki, u vieraśni ž biełarusy žyvuć kłopatami pra ŭradžaj. Tamu ahitacyja za daterminovaje hałasavańnie (maštaby jakoha ŭ nas rastuć z kožnaj kampanijaj takimi tempami, što chutka, zdajecca, asnoŭny dzień hałasavańnia stanie rudymentam) budzie vyhladać naturalnym kłopatam pra intaresy elektaratu. Maŭlaŭ, "adstralaŭšysia" zahadzia, zmožacie sa spakojnaj dušoj vypraŭlacca ŭ vychodny na sotki.
Vybary, navat takija ŭmoŭnyja, jak u nas, apryjory stvarajuć dla ŭładaŭ momant dyskamfortu ŭžo tamu, što mižvoli nahadvajuć paspalitamu ludu ab pryncypie ratacyi kiroŭnych elitaŭ. Tamu zvyšzadača vertykali — kab elektaralnaja kampanija prajšła jak maha bolej nieprykmietna. Minimum palityzacyi nasielnictva. Kažučy kamputarnaj movaj, temu vybaraŭ starajucca zharnuć u systemny łatak.
Što ž da taktyki ŭładaŭ, to jany, musić, prytrymlivajucca mierkavańnia, što ad dabra (u ichnim razumieńni:) dabra nie šukajuć. Małaimavierna, što pojduć na eksperyment z partyjnymi śpisami. Chacia tearetyčna taki varyjant mahčymy: adpaviednyja źmieny ŭ zakanadaŭstva možna ŭnieści na viesnavoj sesii Nacyjanalnaha schodu, nu a "Biełaja Ruś" zaŭždy pad rukoju:) Tak ci inačaj, dobra zmazanaja administracyjnaja mašyna zabiaśpiečyć vyniki jak u aptecy.
Tamu možna zrabić šyroki žest: maŭlaŭ, chaj sabie prysyłajuć z-za miažy kolki zaŭhodna naziralnikaŭ! Hałoŭnaje vyrašajecca latentna. Nu a vizualna na učastkach budzie ŭsio ŭ ažury, kamar dziuby nie padatknie.
Tytulnaja apazycyja, adčuvajučy asudžanaść, rychtujecca da novaj kampanii mlava, inercyjna. Tak i nia ŭtreśli dasiul daŭno abiacany śpis kandydataŭ ad ADS pavodle pryncypu "adzin kandydat — adna akruha". Nia kažučy ŭžo pra raspracoŭku adzinaj stratehii, stylistyki, mesydžu elektaratu i h.d. Dyj nia ŭsie apazycyjanery zhodnyja hulać pavodle praviłaŭ ADS. U Statkieviča, Milinkieviča, kaho-kolviek jašče — svaje scenary (na siońnia nia nadta vyraznyja).
Pakul vyhladaje davoli imaviernym, što paŭtorycca siužet letašnich miascovych vybaraŭ, kali byli deklaravanyja pryhožyja plany skaardynavanych dziejańniaŭ, a potym atrymałasia "chto ŭ les, a chto pa drovy". Kančatkova sapsavała spravu ideja "dva ŭ adnym": pamiatajecie, pieradvybarčuju ahitacyju tady vyrašyli sumiaścić sa zboram podpisaŭ dziela vyłučeńnia na čarhovy kanhres ADS — i ŭ vyniku pytańni "ŭnutryvidavaj baraćby" zasłanili ŭsio astatniaje.
Zaraz u apazycyi taksama nie prahladajecca mocnaj idealohii kampanii, bačańnia jaje jak niejkaha źviana ŭ palittechnalahičnym łancuhu. Va ŭłady ž, jak ni dziŭna, idealohija jość. Jak trapna vykazaŭsia ŭ hutarcy sa mnoj palitolah Viktar Čarnoŭ, heta — "imitacyja lehitymacyi". Ź jahonych słoŭ, siońnia niama ni vonkavych, ni ŭnutranych čyńnikaŭ, kab zmusić uładu da niejkaj liberalizacyi vybarčaha zakanadaŭstva dy elektaralnaj praktyki.
