Lidar sierbskich ultranacyjanalistaŭ Vaisłaŭ Šešal, jaki abvinavačvajecca ŭ vajennych złačynstvach i złačynstvach suprać čałaviečnaści padčas vojnaŭ u Charvatyi i Bośnii ŭ pačatku 1990-ch, admoviŭsia dobraachvotna viartacca ŭ Haahu dla ŭdziełu ŭ Mižnarodnym trybunale pa byłoj Juhasłavi. Šešala vyzvalili z-pad varty pa stanie zdaroŭja ŭ listapadzie 2014 hoda, napiaredadni sud admianiŭ heta rašeńnie.
«Chaj palicyja prychodzić. Jany aryštoŭvajuć ludziej. Kali žandary pryjduć i prymieniać hvałt, jany pavinny być vielmi aściarožnyja. Aryštavać mianie budzie nialohka», — skazaŭ Šešal.
Šešal rastłumačyŭ, što dziaržavie pryjdziecca pačać praceduru ekstradycyi, a za hety čas jon zmoža abskardzić rašeńnie ab aryšcie. Palityk ličyć, što mižnarodny trybunał parušyŭ jaho pravy.
Raniej Reuters paviedamiŭ pra pastanovu sudździaŭ trybunała pa byłoj Juhasłavii. Jany vyrašyli, što Šešal parušyŭ umovy svajho časovaha vyzvaleńnia.
Abvinavačvany, jakoha adpuścili ŭ listapadzie 2014 hoda z-za dyjahnazu «rak u terminalnaj stadyi» abviaściŭ, što viartajecca ŭ palityku i nikoli nie daść źmiaścić siabie ŭ turmu.
Vaisłaŭ Šešal byŭ aryštavany Haahskim trybunałam u lutym 2003 hoda. Jon adbyvaŭ papiaredniaje zaklučeńnie 11 hadoŭ, za hety čas sud trojčy pryznaŭ jaho vinavatym pa druhasnych abvinavačvańniach. Jaho abvinavačvajuć pa 14 punktach, u tym liku ŭ finansavańni, kiraŭnictvie i padtrymcy sierbskich dobraachvotnickich farmiravańniaŭ i raspalvańnia mižnacyjanalnaj varožaści padčas vojnaŭ u Charvatyi i Bośnii.
U 1991 hodzie Šešal zasnavaŭ Sierbskuju radykalnuju partyju, jakaja stała pierajemnicaj arhanizacyi «sierbskich četnikaŭ». Členy hetaj arhanizacyi patrabujuć abjadnańnia ŭ adnoj dziaržavie ŭsich ziemlaŭ, na jakich pražyvajuć sierby. U čas vajny ŭ byłoj Juhasłavii Šešal publična padtrymaŭ pieraśled charvataŭ pavodle nacyjanalnaj prykmiety.
