Padstavy dla źnižeńnia staŭki padatku na dadadzienuju vartaść u krainie adsutničajuć, ličyć namieśnik ministra finansaŭ Dźmitryj Kijko.
Nahadajem, staŭka padatku na dadadzienuju vartaść u Biełarusi značna vyšejšaja (20%), čym u inšych krainach Jeŭrazijskaha ekanamičnaha sajuza. U Rasii staŭka PDV składaje 18%, u Kazachstanie — 12%. Biełaruskija biźnies-sajuzy dla stvareńnia roŭnych umoŭ haspadarańnia ŭ jeŭrazijskim sajuzie prapanoŭvali źnizić staŭku PDV u krainie.
«Sapraŭdy, staŭka padatku ŭ Rasii i Kazachstanie prykmietna mienšaja. Ale roźnica abumoŭlenaja abjektyŭnymi pryčynami — najaŭnaściu ŭ našych partnioraŭ naftahazavych dachodaŭ», — havorycca ŭ publikacyi namieśnika ministra finansaŭ Dźmitryja Kijko, raźmieščanaj u apošnim numary časopisa «Finansy, učiet, audit», jaki vydaje Minfin.
Namieśnik ministra źviarnuŭ uvahu, što ŭ Rasii na naftahazavyja dachody prypadaje pryblizna 10,5% VUP, u Kazachstanie — 12,3% VUP.
«U Biełarusi pakazčyki abjektyŭna nižejšyja. U nas na naftahazavyja dachody ŭ 2014 hodzie prypała 1,3% VUP. U 2015 hodzie čakańni pavialičanyja da 4,3% VUP, ale prahnoz budujecca ŭžo z ulikam zaličeńnia vyvaznych pošlin na naftapradukty ŭ naš biudžet», — adznačaje Kijko.
Jon źviarnuŭ uvahu, što dla Biełarusi PDV źjaŭlajecca «asnoŭnaj krynicaj papaŭnieńnia kazny», na dolu jakoj prypadaje bolš za 37% usich dachodaŭ biudžetu, a ŭ Rasii za košt PDV farmirujecca pryblizna 20% dachodaŭ, u Kazachstanie — prykładna 14%.
«Z ulikam ekanamičnaj situacyi, siarod inšaha abumoŭlenaj źniešnimi faktarami, reziervy pa źnižeńni stavak asnoŭnych padatkaŭ (u tym liku PDV) siońnia adsutničajuć», — padkreśliŭ Kijko.
U studzieni—lutym 2015 hoda, pavodle infarmacyi BiełaPAN, ad padatku na dadadzienuju vartaść u respublikanski biudžet pastupiła 9,4 trłn. rubloŭ, na PDV prypała amal 39% sukupnych dachodaŭ biudžetu.
