«Spadziajusia, što pytańnie kredytu dla Biełarusi budzie vyrašanaje jašče ŭ lutym — zajaviŭ na siońniašniaj pres‑kanferencyi časovy pavierany ŭ spravach Venesueły ŭ Biełarusi Ameryka Dyjas Nuńjes. — Ciapier hetaje pytańnie razhladajecca. Kankretnuju sumu nazvać nie mahu, ale havorka idzie pra dastatkova vialikija hrošy».
Mahčyma, pytańnie kredytu budzie vyrašana padčas vizytu ŭ Karakas u siaredzinie lutaha biełaruskaj uradavaj delehacyi na čale ź dziaržsakratarom Rady biaśpieki Viktaram Šejmanam, jakaja adbudziecca ŭ siaredzinie nastupnaha miesiaca. Padčas vizytu budzie ŭdakładniena prahrama pryjezdu Uha Čavesa ŭ Biełaruś. Chutčej za ŭsio, lider Venesueły naviedaje Miensk naprykancy lutaha ci ŭ pačatku sakavika. Heta ŭžo budzie treci vizyt Čavesa ŭ našu krainu. Prykładna ŭ hety samy termin jon prylacić i ŭ Rasieju.
Taksama ŭ Karakasie moža być padpisany kantrakt na hazyfikacyju horadu Barynas. Budzie zaklučanaje pahadnieńnie i ab pastaŭcy ŭ Paŭdniovuju Ameryku hazavych plitaŭ «Hiefest» i navahradzkich bazavych balonaŭ.
Na hety momant miž Biełaruśsiu i Venesuełaj utvorana niekalki sumiesnych pradpryjemstvaŭ: 3 — pa mašynabudaŭnictvie (za akijanam budzie adbyvacca zborka BiełAZaŭ, MAZaŭ i traktaroŭ «Biełaruś»), 2 — pa zdabyčy nafty, 1 — pa budaŭničych materyjałach.
Užo aktyŭna viadziecca supracoŭnictva pa zdabyčy nafty. Štodnia biełarusy zdabyvajuć u Venesuele 5 tysiač barelaŭ «lohkaj» nafty. Ciapier idzie havorka pra pradastaŭleńnie Biełarusi jašče niekalkich radovišč, prynamsi, u šelfie raki Arynoka. Darečy, Biełaruś nia całkam vałodaje hetymi śvidravinami. Prybytki dzielacca paroŭnu miž našaj dziaržavaj i Venesuełaj. Cikavy momant, što Biełarusi vydzielili staryja śvidraviny, jakija ŭžo bolš za 50 hadoŭ. Adnak venesuelski dyplamat zapeŭniŭ, što nafty ŭ ich jašče dastatkova.
Sp.Nuńjes nie adkazaŭ naŭprost, jaki na siońniašni dzień tavarazvarot miž našymi krainami. Jon adznačyŭ, što sapraŭdnaje supracoŭnictva pačałosia tolki letaś. Da hetaha našy adnosiny bazavalisia amal vyklučna na eksparcie ŭ Venesuełu chlorystaha kaliju. «Niahledziačy na dalokuju adlehłaść miž krainami, my nazirajem burlivaje raźvićcio ŭ našych adnosinach», — skazaŭ Ameryka Nuńjas. Nia vyklučana, što ŭžo sioleta ŭ Biełaruś pastupić pieršaja, 20‑tonnaja, partyja venesuelskaj kavy. Biełarusy ž u Balivaryjanskuju respubliku, aproč traktaroŭ i budaŭničych materyjałaŭ, buduć pastaŭlać suchoje małako.
Dyplamat adznačyŭ, što ciapier viadziecca praca nakont admieny vizaŭ dla biełaruskich hramadzian, jakija naviedvajuć Venesuełu, chacieŭ by sp.Nuńjes bačyć i pramy avijarejs miž Mienskam i Karakasam. Krainy źbirajucca pieradać va ŭłasnaści adna adnoj budynki dla pasolstvaŭ. Venesuelcy planujuć adkryć u Miensku i konsulski adździeł.
