Upraŭleńnie departamienta finansavych rasśledavańniaŭ Kamiteta dziaržkantrolu pa Minskaj vobłaści i Minsku sumiesna z departamientam finansavaha manitorynhu spyniła dziejnaść złačynnaj hrupy, čyje pasłuhi vykarystoŭvalisia na cieniavym rynku, dazvalajučy kampanijam realnaha siektara ekanomiki nie vypłačvać padatki.
Jak paviedamiła pres-słužba KDK, u svajoj dziejnaści ŭdzielniki złačynnaj hrupy vykarystali zvyš 15 jurydyčnych asob i 30 pradprymalnikaŭ, jakija byli poŭnaściu padkantrolnyja złačynnaj hrupie. Rabotnikam finansavaj milicyi ŭdałosia apieratyŭna spynić pracu hetaj sietki padstaŭnych kampanij. Da prykładu, adna z takich fiktyŭnych struktur była stvoranaja ŭsiaho tolki miesiac tamu. Ale navat za taki karotki pramiežak času praź jaje było praviedziena 1,7 młrd. rubloŭ. U cełym uron ad dziejnaści złačynnaj hrupy skłaŭ bolš jak 30 młrd. rubloŭ.
Sutnaść pracy łžepradprymalnikaŭ zvodziłasia da taho, što jany atrymlivali na rachunki padkantrolnych iłžestruktur ad kampanij realnaha siektara ekanomiki bieznajaŭnyja hrašovyja srodki, jakija ŭ dalejšym pieravodzilisia ŭ najaŭnyja hrošy praz rachunki padkantrolnych pradprymalnikaŭ, zdymalisia i ŭžo ŭ jakaści najaŭnych viartalisia kiraŭnikam kampanij realnaha siektara ekanomiki. Niezakonna atrymanyja hrošy vykarystoŭvalisia na kuplu darahich aŭtamabilaŭ i nieruchomaści.
Jak zaznačyła pres-słužba, važkuju rolu ŭ spynieńni dziejnaści złačynnaj hrupy adyhrała infarmacyja, atrymanaja z departamienta finansavaha manitorynhu. Praanalizavaŭšy pracu 20 arhanizacyj, jakija pracavali pa pryncypie łžestruktur, śpiecyjalisty finansavaj raźviedki ŭstanavili, što pa ich rachunkach pravodzilisia raźliki za roznyja tavary. Aprača taho, hrošy jakija pastupali, adrazu ž pieravodzilisia ŭ adras inšych arhanizacyj. Łžestruktury faktyčna akazvali arhanizacyjam realnaha siektara ekanomiki pasłuhi pa ŭchileńni ad vypłaty padatkaŭ i lehalizacyi padpolnych tavaraŭ i cieniavoha dachodu. Adnačasova praź iłžestruktury ažyćciaŭlaŭsia vyvad hrašovych srodkaŭ kamiercyjnych arhanizacyj u cieniavy abarot i ich pieravod u najaŭnyja hrošy.
Pa faktach iłžepradprymalnictva, niezakonnaj pradprymalnickaj dziejnaści i ŭchileńnia ad upłaty padatkaŭ orhanami finansavych rasśledavańniaŭ raspačatyja čatyry kryminalnyja spravy. Dzieviać najbolš aktyŭnych udzielnikaŭ złačynnaj hrupy byli zatrymanyja. Udzielnikam złačynnaj hrupy pahražaje pakarańnie ŭ vyhladzie pazbaŭleńnia voli na termin da siami hadoŭ.
