U Biełarusi skasavali zabaronu na rost roźničnych cen na tavary ŭ paraŭnańni z cenami, jakija dziejničali na 18 śniežnia 2014 hoda.
Takoje rašeńnie źmiaščajecca ŭ pastanovie Savieta Ministraŭ №250 ad 31 sakavika, jakim uniesieny źmieny ŭ pastanovu №1207 ad 19 śniežnia 2014 hoda «Ab niekatorych pytańniach spažyvieckaha rynku». Dakumient apublikavany siońnia na Nacyjanalnym pravavym internet-partale.
Akramia taho, pastanova zahadvaje ministerstvam handlu, suviazi i infarmatyzacyi, Biełaruskamu respublikanskamu sajuzu spažyvieckich tavarystvaŭ, abłvykankamam i Minskamu harvykankamu zabiaśpiečyć najaŭnaść šyrokaha asartymientu spažyvieckich tavaraŭ u handlovych abjektach, u tym liku internet-kramach.
Adkaznaść za nasyčeńnie spažyvieckaha rynku niecharčovymi tavarami ajčynnaj vytvorčaści ŭskładzienaja na namieśnikaŭ premjer-ministra Biełarusi Anatola Kalinina i Uładzimira Siamašku ŭ adpaviednaści z raźmierkavańniem abaviazkaŭ, charčovymi tavarami ajčynnaj vytvorčaści — na vice-premjera Michaiła Rusaha, za stabilnaść cen i zabieśpiačeńnie šyrokaha asartymientu tavaraŭ u roźničnaj handlovaj sietcy — na pieršaha namieśnika premjer-ministra Vasila Maciušeŭskaha.
Pastanova №250 ustupaje ŭ siłu z dnia jaje pryniaćcia.