Siońnia ŭ Internecie aktyŭna abmiarkoŭvajecca šakujučy vystup škoły tanca «Kreda» ŭ Arenburhu. Na spravazdačnym kancercie škoły, jaki adbyŭsia ŭ kancy studzienia, dziaŭčaty pakazali numar «Pčołki i Vini-Puch».
Taniec pčołak pastaŭleny ŭ papularnym apošnim časam styli «Tviork». Styl hety uvajšoŭ u modu paśla taho, jak na adnoj z cyrymonij MTV padobny taniec vykanała amierykanskaja śpiavačka Majli Sajrus. U rasijskaj błahaśfiery asablivy rezanans vyklikali kaściumy arenburhskich paśladoŭnic Majli Sajrus, paviedamlaje telekanał Dožd́.
Pad viečar rasijskija ŚMI źviazalisia z kiraŭnikom tancavalnaj škoły Viktoryjaj Jakavienka, paviedamlaje Bi-Bi-Si. Jakavienka paćvierdziła, što siarod dziaŭčat u kaściumach pčołak byli niepaŭnaletnija, adnak usie jany zajmajucca tancami sa zhody baćkoŭ, dla jakich i vystupali ŭ toj viečar.
«Što da šumu, to heta kirunak tanca ciapier vielmi papularny, i ŭ sietcy možna znajści kudy bolš adkrytyja roliki», - skazała jana vydańniu LifeNews.
Jana źviarnuła ŭvahu na toje, što videa było apublikavana na YouTube biez zhody dziaciej i baćkoŭ, i zaklikała asobna pravieryć hety fakt.
Pavodle infarmacyi rasijskich ŚMI, «pčołkami» taksama zacikavilisia ŭ administracyi Arenburha i miascovaj prakuratury.
Akramia Booty Dance, u Arenburhskaj škole «Kreda» dziaŭčat navučajuć brejkdansu, uschodnim i eratyčnym tancam (Strip Dance). Zapisacca ŭ škołu mohuć jak dzieci, tak i darosłyja.
