Viktoryja Azaranka zdabyła pieršaje ačko dla zbornaj Biełarusi ŭ matčy za vychad u druhuju Suśvietnuju hrupu rozyhryšu Kubka Fiederacyj z kamandaj Japonii.
Siońnia ŭ startavym adzinočnym pajadynku na chardovych kortach spartkompleksu Ariake Coliseum pieršaja rakietka biełaruskaj kamandy, jakaja zajmaje 32-je miesca ŭ suśvietnym rejtynhu, upeŭniena pierajhrała Misaki Doi (107-y numar suśvietnaha rejtynhu) - 6: 1, 6: 2. Paśla ich zhulajuć Volha Havarcova (136) i Kurumi Nara (54).
Pieršy niadzielny pajadynak startuje a 6 ranicy pa minskim časie - Viktoryi Azaranki budzie supraćstajać Kurumi Nara. Uśled za imi Volha Havarcova sustreniecca z Misaki Doi. Na parnuju sustreču kapitan biełaruskaj kamandy Taćciana Pučak zajaviła Alaksandru Sasnovič (146) i Vieru Łapko (593), a kapitan japonak Juka Kanieka raźličvaje na Siuka Aajama (198) i Ajumi Marytu (451).
U pačatku lutaha zbornaja Biełarusi ŭ takim ža składzie ŭ Budapiešcie paśpiachova praviała pieršy kvalifikacyjny etap Kubka Fiederacyj, atrymaŭšy prava pazmahacca za vychad u druhuju suśvietnuju hrupu. U vienhierskaj stalicy biełaruskaja kamanda pieramahła zbornyja Hruzii (3:0), Bałharyi (3:0), Partuhalii (2:1) i Vialikabrytanii (2:0). Japonskija tenisistki taksama ŭpeŭniena vystupili ŭ svajoj terytaryjalnaj kvalifikacyi. U kitajskim Huančžou jany atrymali 4 «suchija» viktoryi - nad tenisistkami Respubliki Kareja (3:0), Hankonha (3:0), Uźbiekistana (3:0) i Kazachstana (2:0).
Raniej biełaruskija tenisistki tolki adnojčy sustrakalisia ź japonkami ŭ rozyhryšy Kubka Fiederacyj. U 1999 hodzie zbornaja Biełarusi, za jakuju vystupali Natalla Źvierava i Volha Barabanščykava, abyhrali supiernic ź likam 2:0 na kvalifikacyjnym matčy druhoj Suśvietnaj hrupy. Ciapier u kamandnym žanočym rejtynhu zbornaja Biełarusi zajmaje 19-je miesca, a ich supiernicy znachodziacca na 15-j pazicyi. U apošni raz zbornaja Biełarusi hulała ŭ druhoj Suśvietnaj hrupie ŭ 2012 hodzie, ale sastupiła kamandam ZŠA (0:5) i Šviejcaryi (1:4).
Akramia matču ŭ Tokia ŭ nastupny ŭik-end projduć jašče 3 sustrečy za vychad u druhuju Suśvietnuju hrupu Kubka Fiederacyj: Sierbija - Parahvaj, Słavakija - Šviecyja, Arhiencina - Ispanija.
