Hałoŭny trenier zbornaj Biełarusi pa futzale Siarhiej Safonaŭ pierad siońniašnim čverćfinałam z Parahvajem vielmi raźličvaje na padtrymku balelščykaŭ, a taksama na dapamohu miedykaŭ.
Pra heta jon paviedamiŭ karespandentu BiełTA za sutki da sustrečy z parahvajcy.
Kali z zaŭziatarami ŭsio zrazumieła — jany i da hetaha vydatna natchniali biełarusaŭ na dobruju hulniu, to miedyki vyjšli na pieršy płan paśla sustreč hrupavoha raŭnda. Pa słovach treniera, u kamandzie šmat traŭmavanych, pryčym u niekatorych hulcoŭ paškodžańni nastolki surjoznyja, što ich udzieł u siońniašnim archivažna pajadynku ŭsio jašče pad vialikim pytańniem. Adnak, niahledziačy na ŭsie prablemnyja pytańni, zadača ŭ jaho padapiečnych zastajecca raniejšaj — baraćba za pieramohu ŭ kožnym kankretnym pajadynku, niezaležna ad kłasa supiernika.
Nastaŭnik taksama nahadaŭ, što na minułym čempijanacie śvietu ŭ Kałumbii ŭ 2011 hodzie zbornaja Biełarusi ŭ čverćfinale sustrakałasia mienavita z Parahvajem i sastupiła ź likam 2:3, tak što zaraz pryjšoŭ čas revanšu. Zbornaja Parahvaja na ČS-2011 dajšła da finału, dzie sastupiła haspadaram turniru kałumbijcam ź likam 2:8.
Zbornaja Biełarusi ŭ papiaredniaj hrupie A čempijanatu śvietu-2015 spačatku adoleła kamandu Brazilii - 2:1, sastupiła uruhvajcam - 2:3, a potym uziała vierch nad aŭstralijcami - 2:1.
Na ciapierašnim płanietarnym forumie biełaruskija futzalisty paŭtaryli svoj lepšy vynik suśvietnych pieršynstvaŭ - da heta jany trojčy hulali ŭ čverćfinale (1997, 2000, 2011), ale pakul ni razu nie zmahli pieraadoleć hety barjer.
Pajadynak zbornych Biełarusi i Parahvaja projdzie na placoŭcy staličnaha Pałaca sportu i budzie pakazany ŭ pramym efiry telekanała «Biełaruś 2» pačynajučy z 20.10.
Dvuma hadzinami raniej tam ža zhulajuć kamandy Uruhvaja i Bielhii (pramaja tranślacyja na telekanale «Biełaruś 5»).
Dva matčy za vychad u paŭfinał adbuducca na placoŭcy bresckaha spartkompleksu «Viktoryja»: Kałumbija — Rasija (19.00), Arhiencina — Čechija (21.00).
