Kala škoły №84 va Uruččy 22 krasavika, u dzień naradžeńnia Lenina, źjaviŭsia pomnik pravadyru rasijskaj revalucyi.
Raźbity pomnik skleili i zrabili dla jaho novy pjedestał.
Stvorany jašče ŭ 1950-ch pomnik raniej stajaŭ na vulicy Hierojaŭ 120 dyvizii, ale padčas ramontu darohi byŭ źniesieny. Pa «zahadzie źvierchu» jaho pieranieśli da škoły.
Padčas znosu pomnik raskałoŭsia na dva kavałki, ale byŭ adramantavany. Praŭda, raskolina na pojasie bačnaja.
Jak śćviardžaje dyrektar škoły Iryna Karpovič, pomnik nie ŭstaloŭvaŭsia mienavita pad dzień naradžeńnia Lenina, a ŭračysta adkryty budzie 19 maja, na Dzień pijanierskaj družby — pakul terytoryja vakoł pomnika nie dobraŭparadkavanaja.
Lenin hladzić na hanak škoły.
Na pytańnie pra toje, čamu pomnik pastavili mienavita kala škoły, dyrektar adkazała: «U vajennym haradku niekalki pomnikaŭ. Pahadziciesia, było b dziŭna, kali b pobač stajali dva Leniny. Ale rašeńnie ab pieranosie mienavita da hetaj škoły pryniała prajektnaja arhanizacyja».
Ahułam u Minsku naličvajecca kala 15 pomnikaŭ i biustaŭ Lenina.
Samy vialiki staić kala Doma Uradu na płoščy Niezaležnaści (byłoj płoščy Lenina). Taksama pomniki Leninu stajać u dvary BDU, kala zavodaŭ «Kamunarka», «Kryštal», motaviełazavoda, elektratechničnaha zavoda, spartkompleksa «SKA-Uručča», vajskovaj častcy PVA na Łahojskim trakcie i ŭ inšych miescach. Pomnik junamu Leninu staić la doma 91 pa praśpiekcie Niezaležnaści.
U honar Lenina ŭ Minsku nazvanaja adna z centralnych vulic i stancyja mietro pad płoščaj Niezaležnaści.
«Voś asabista na maju dumku: jak vy ličycie, u cyvilizavanych krainach jakoje staŭleńnie da pomnikaŭ historyi i kultury? Heta była naša historyja. Voś va Ukrainie razburajuć usio — a žyć što, lepš stała?» — patłumačyła namieśnica dyrektara pa navučalnaj pracy Halina Čumak.
Školniki apranajucca ŭ harderobie.
Dyrektar škoły Iryna Karpovič admoviłasia ad kamientaroŭ «Našaj Nivie» i patłumačyła, što pomnik pakul całkam znachodzicca pad jurysdykcyjaj administracyi Pieršamajskaha rajona i nie byŭ pieradadzieny na bałans škoły. Asabisty pohlad na darečnaść pomnika Leninu na školnaj terytoryi Karpovič taksama nie vykazała.
Atrymać kamientary ad pradstaŭnikoŭ administracyi Pieršamajskaha rajona pakul nie ŭdałosia.
