Kreml nie źmianiŭ svajoj pazycyi adnosna ŭkrainskaha šturmana Nadziei Saŭčanki, jakuju praciahvajuć utrymlivać u Rasiei. Pra heta zajaviŭ pres-sakratar rasiejskaha prezydenta Dźmitry Piaskoŭ, kamentujučy rezalucyju Eŭraparlamenta ab Saŭčancy.
«Idzie śledztva, abvinavačvajuć jaje ŭ datyčnaści da vielmi surjoznaha złačynstva, budzie sud. Prezydent pra heta kazaŭ, ničoha nie źmianiłasia, i dadać da hetaha niama čaho», — skazaŭ Dźmitry Piaskoŭ, adkazvajučy na pytańnie, ci abmiarkoŭvałasia z Pucinym mahčymaść amnistyi Nadziei Saŭčanki.
30 krasavika Eŭraparlament pryniaŭ rezalucyju z zaklikam da Rasiei vyzvalić narodnaha deputata, člena delehacyi Ŭkrainy ŭ PARE Nadzieju Saŭčanku. U Eŭraparlamencie adznačajuć, što ŭ Rasiei niama zakonnych padstavaŭ abo jurysdykcyi dla ŭtrymańnia Saŭčanki. Deputaty Eŭraparlamentu adznačajuć, što asobam, jakija adkaznyja za niezakonnaje ŭtrymańnie Saŭčanki, pahražajuć mižnarodnyja sankcyi ci sud.
U śniežni letaś Saŭčanka abviaściła haładoŭku na znak pratestu suprać zatrymańnia. 5 sakavika advakaty Saŭčanka paviedamili, što jana vyrašyła častkova prypynić haładoŭku, jakuju trymała bolš za 80 dzion. 16 sakavika jana adnaviła haładoŭku. 3 krasavika pradstaŭniki Savieta pa pravach čałavieka pry prezydencie Rasiei paviedamili, što Saŭčanka pakrysie prymaje ježu.
U Rasiei Nadzieju Saŭčanku abvinavačvajuć u datyčnaści da hibieli rasijskich žurnalistaŭ na Danbasie, a taksama ŭ niezakonnym pierasiačeńni miažy Rasiejskaj Federacyi. Nadzieja Saŭčanka ŭsie abvinavačvańni abviarhaje.
