La padnožža Kurhana słavy ludzi abstupili arhanizataraŭ, jakija doŭha niešta vyrašali z hukam, pierad pačatkam vystupu. Jašče bolšym paŭkołam prysutnych zamknuli stały narodnych majstroŭ i kalekcyjanieraŭ z kłubu «Skarabiej». Tyja, u kaho nie atrymałasia stać u pieršyja šerahi, lezuć na tanki, jakija stajać pry kurhanie, kab usio ŭbačyć.
Pa liku heta ŭžo XV fiestyval słavianskich adzinaborstavaŭ u Horadni. Sa słoŭ arhanizatara, lidara «Niomanskaha kazactva» Uładzimira Adamava, fiestyval sabraŭ kala 30 kłubaŭ z Rasii i Biełarusi. Paru hod tamu siudy zavitvali navat ukraincy — u vyšyvankach dy šaravarach…
Uładzimir Adamaŭ.
Padčas abjaŭleńnia ŭdzielnikaŭ dy arhanizataraŭ hukatechnika znoŭku łamajecca, i skandalnuju arhanizacyju «Ruś mołodaja» abjaŭlajuć ledźvie nie šeptam. Cikava, što badaj upieršyniu na fiestyval pryjechaŭ asabista Siarhiej Łušč, lidar «Rumoła», choć pra jaho padtrymku inicyjatyvy Adamava viadoma było zdaŭna.
«Rumołaŭcy» pracujuć vokamhnienna: adrazu paśla abjaŭleńnia kala dziasiatka dziaŭčat pačynajuć razdavać čorna-aranžavyja stužki. Ludzi biaruć achvotna, viažuć na ruki, zaplečniki, uplatajuć u vałasy. Niekranutyja «kałaradskimi kolerami» zastajucca tolki padaśpiełyja studenty-turkmieny, dziejsnyja vajskoŭcy dy aficyjoz z čyrvona-zialonym jabłynievym ćvietam na hrudziach.
Siarhiej Łušč.
Padčas vystupaŭ pravasłaŭnych vajskova-patryjatyčnych kłubaŭ udzielniki adnaho ź ich raźbivajuć ab hałovy silikatnyja błoki z nadpisam «słavianie». Instruktar, były desantnik, naziraje za vychavancami. Tut ža — pakazalnyja pryjomy samaabarony: nož, pistalet, humovaja dubinka… Usio pad vybuchi piratechniki.
Lišnimi va ŭsim hetym vyhladajuć rycary z «Biełaha Piehasa», «Družyny sv.Patryka» dy inšych kłubaŭ. Rycary pakazvajuć sieryju dvubojaŭ, pakul dziaŭčaty z kłubaŭ zabaŭlali dziaciej butaforskaj zbrojaj.
Apafieoz fiestyvalu — vystup kazačaha kłuba «Jarmak» z Babrujsku na temu VAV. Heta rekanstrukcyja boju partyzanaŭ ź niemcami, kab adbić svajho pałonnaha. Cikava, što najvyšejšy pa roście «niemiec» z płastykavym aŭtamatam na hałavie maje piłotku ad stroju biełaruskaj milicyi 90-ch.
Ździviła, što natoŭp ź niekalkich sotniaŭ haściej i ŭdzielnikaŭ achoŭvała ažno… dvoje milicyjantaŭ, jakija tulilisia niedzie zboku. Reč dla Biełarusi amal niesamavitaja.
