Biełaruś hatovaja dapamahčy Kitaju ŭ raźvićci tych vidaŭ sportu, u jakich biełaruskija spartsmieny damahajucca pośpiechaŭ, a ŭ KNR jašče nie tak šyroka raźvityja. Pra heta kiraŭnik biełaruskaj dziaržavy Alaksandr Łukašenka zajaviŭ u intervju kitajskim ŚMI — Centralnamu telebačańniu Kitaja i infarmacyjnamu ahienctvu «Sińchua», paviedamili ŭ pres-słužbie biełaruskaha lidara.
Alaksandr Łukašenka raskazaŭ, što, budučy ŭ Kitai, taksama hulaŭ u chakiej. «My znajšli ladovy katok u vas i hulali z vašymi kitajskimi chakieistami. Vy viedajecie, u vas viedajuć chakiej i ŭmiejuć ŭ jaho hulać. Kitaj treba navučyć dobra hulać u chakiej. I ŭ dadzienym vypadku vy možacie skarystacca nie tolki pasłuhami biełarusaŭ, ale i rasiejcaŭ», — adznačyŭ jon.
«Nie mnie vas vučyć. Vy na svajoj Alimpijadzie pieramahli ź vialikaj pieravahaj. A jašče zusim niadaŭna Kitaj vystupaŭ u niekalkich vidach, kitajskich spartsmienaŭ na vialikaj arenie nie było vidać, a ciapier… Vy pieramahli najbujniejšyja spartyŭnyja dziaržavy, i postsavieckija respubliki, u tym liku Rasiju, i Amieryku, i jeŭrapiejskija dziaržavy. Značyć, vy ŭmiejecie», — skazaŭ kiraŭnik dziaržavy.
«Što tyčycca letnich vidaŭ sportu, vy ŭmiejecie ŭsio nie horš za nas. I našy treniery taksama pracavali ŭ Kitai, vučyli kitajskich spartsmienaŭ. Ciapier vam treba ŭziacca za zimovyja vidy. Vy ž umiejecie na łyžach biehać — u vas źjavilisia dobryja spartsmieny. Vy ŭdzielničajecie ŭ bijatłonnych spabornictvach — u vas bijatłanisty niadrennyja», — adznačyŭ Alaksandr Łukašenka.
Jon padkreśliŭ, što kali ŭ kitajskaha boku jość cikavaść da niejkich vidaŭ sportu, jakija raźvivajucca ŭ Biełarusi, to biełaruski bok hatovy padklučycca i dać svaich śpiecyjalistaŭ.
«Prynamsi, na hetaj stadyi my vam možam značna dapamahčy. Kali patrebnyja buduć vielmi vysokija vyniki, u tym liku pa chakiei, tady vy zmožacie skarystacca śpiecyjalistami i kanadskimi, i amierykanskimi, dy i my padraściem da taho času, ale treba pačynać, kab nie prapuścić čempijanat śvietu», — skazaŭ kiraŭnik dziaržavy.
«Słuchajcie, Japonija ŭ chakiej hulaje, i davoli niadrenna hulaje! Niachaj jašče ŭ siaredzinie niedzie, nie ŭ elicie, ale ŭžo hulaje. Ja ŭpeŭnieny, što 7-10 hadoŭ — i Kitaj budzie kankuravać ź viadučymi chakiejnymi dziaržavami. Kali vy pastavicie pierad saboj metu», — ličyć biełaruski lidar.
«Tamu, kab nie prapuścić čempijanat, Kitaju treba tolki pastavić pierad saboj metu. A jak heta rabić — vy viedajecie. I ja asabista tolki b vitaŭ, kali b kitajskaja zbornaja źjaviłasia na mižnarodnaj arenie. Ja za jaje b zaŭzieŭ», — skazaŭ Alaksandr Łukašenka.
