 |
50 pieršych patencyjnych kandydataŭ u deputaty Pałaty pradstaŭnikoŭ ad abjadnanaj demakratyčnaj apazycyi zaćvierdzili 10 lutaha na pašyranym pasiedžańni Palitrady abjadnanych demakratyčnych siłaŭ u Miensku. Takim čynam, hetyja ludzi faktyčna ŭžo mohuć rychtavacca da vybaraŭ, jakija zhodna ź dziejnym zakanadaŭstvam musiać prajści sioleta ŭvosień.
Na vybarach u Pałatu pradstaŭnikoŭ budzie 110 akruhaŭ. Ale 10 lutaha zaćvierdzili tolki 50 pretendentaŭ. Sprava ŭ tym, što praceduru ŭzhadnieńnia kandydataŭ pakul całkam praviali tolki ŭ troch rehijonach — stalicy, Viciebskaj i Homielskaj abłaściach.
 Anatol Labiedźka |
«Nikoli raniej takoha jašče nia było. I heta ja liču našaj pieramohaj. Škada, što nie zaćvierdzili pa ŭsich akruhach, ale i 50 — heta prykładna pałova».
Karespandent: «A što ŭ inšych akruhach?»
«Jurydyčnaje, pravavoje rašeńnie moža być pryniataje tolki Palityčnaj radaj. Heta de‑iure. A de‑fakta ŭ Mienskaj, Haradzienskaj i navat ŭ Mahileŭskaj abłaściach jość uzhodnienyja kandydaty».
Cikaŭlusia ŭ spadara Labiedźki proźviščami ŭžo zaćvierdžanych kandydataŭ:
«Heta Stanisłaŭ Bahdankievič, Vincuk Viačorka, Siarhiej Kalakin, Alaksandar Dabravolski i šmat tych, kaho viedajuć u rehijonach».
«A ci jość u hetych śpisach proźviščy maładych ludziej, žančyn?»
«Jość. Siońnia jak raz adznačali, jak pazytyŭny faktar, što ŭžo ŭzhodnienyja kandydatury 7 žančyn. I jość maładyja. Prykładam, pa Miensku pojduć dva pradstaŭniki «Maładoha frontu». Heta śviedčyć jak raz pra toje, što nichto nikoha nie zaciskaŭ. I tyja rehijanalnyja arhanizacyi, jakija chacieli ŭ hetym pracesy ŭdzielničać, i jakija dakazvali, što ich kandydaty najbolš kankurentazdolnyja, jany majuć i pośpiech».
Abjadnanyja demakratyčnyja siły 10 lutaha taksama vyznačyli ŭmovy, nieabchodnyja dla taho, kab pravieści vybarčuju kampaniju adpaviedna standartam ABSE. Svaje patrabavańni jany niepasredna vykładajuć biełaruskim uładam, jakich zaklikajuć da dyjalohu. I dajuć im termin da 25 krasavika, udakładniaje pieršy namieśnik staršyni Partyi BNF Vincuk Viačorka:
 Vincuk Viačorka |
«Pieradusim heta vyzvaleńnie palityčnych viaźniaŭ, a taksama spynieńnie inšych formaŭ palityčnych represijaŭ. My patrabujem harantavanaha ŭklučeńnia ŭ kamisii ŭsich roŭniaŭ, ja padkreślivaju, usich roŭniaŭ pradstaŭnikoŭ abjadnanych demakratyčnych siłaŭ. My patrabujem rehistracyi našych kandydataŭ.
My z hetaha robim pramuju vysnovu — ci musić mižnarodnaja supolnaść zahadzia pryznavać ci nie pryznavać tuju vybarčuju kampaniju, jakaja zaraz rychtujecca. My ŭ kožnym razie rychtujemsia da mabilizacyjna‑infarmacyjnaj kampanii, i ŭ vypadku nievykanańnia ŭładami hetych padstavovych kryteraŭ my vykarystoŭvajem ŭsie tyja mahčymaści, jakija daje vybarčaja kampanija dla padrychtoŭki pratestnych akcyjaŭ. I rezervujem za saboju prava, što nam kankretna rabić, kali ŭłady hetyja varunki vykonvać nia buduć».
