Źmicier Vajciuškievič prezientavaŭ na Tuzin.fm studyjny zapis pieśni «Žyvie Biełaruś» na słovy Uładzimira Niaklajeva i zaprašaje ŭsich ŭziać udzieł u stvareńni «narodnaha» klipa na jaje.
Kampazicyja patrapić na novy albom Vajciuškieviča «Naša pieśnia», prezientacyja jakoha adbudziecca 6 červienia na kancercie ŭ Vilni. Amal usie kvitki na jaho ŭžo pradadzienyja.
«Heta pieśnia pra narmalnaje čałaviečaje pačućcio nieparyŭnaj suviazi sa svajoj krainaj. Jano va ŭsim, što my robim. Jano z nami kožny dzień, — raspaviadaje Źmicier. — Zaprašaju ŭsich uziać udzieł u narodnym klipie na jaje.
Ideja videa u tym, kab adyści ad płakatnaha patryjatyzmu i ściahoŭ-transparantaŭ. Davajcie praśpiavajem hetuju pieśniu ŭ pracy i na adpačynku, ź siabrami, kalehami i rodnymi ludźmi. Davajcie pakažam, što my dobryja, pracavityja, ščyryja ludzi!».
Techničnyja pažadańni ad tvorčaj supołki «Try maki», jakaja budzie stvarać videa:
1) śpiavajcie pieśniu pad aŭdyjozapis tvora, kab supadała chutkaść;
2) zdymajcie šyrokaje haryzantalnaje videa (nie Instagram), pažadana na fotaaparat ci dobry telefon;
3) videa zapampujcie na fajłaabmieńnik (naprykład, Wetransfer, Dropbox) i dašlicie spasyłku na mejł [email protected].
Videa prymajecca da 25 maja (uklučna). Piać najbolš cikavych i aktyŭnych ŭdzielnikaŭ atrymajuć CD «Naša pieśnia» z aŭtohrafam Źmitra Vajciuškieviča.
