U Smalavickim rajonnym sudzie pačaŭsia administracyjny praces nad aktyvistam «Eŭrapiejskaj Biełarusi» Maksimam Viniarskim, jakoha abvinavačvajuć u abrazie milicyjanta sa Smalavickaha RUUS.
Pavodle pratakołu, jaki byŭ składzieny na Viniarskaha 15 traŭnia, jon nazvaŭ «upyrom» milicyjanta Lesicu. Incydent adbyŭsia, kali aktyvisty, u tym liku Viniarski, pryjechali da Smalavickaha RUUS, kab sustreć paśla adbyćcia aryštu svajho adnadumca Leanida Kułakova.
Administracyjnuju spravu Viniarskaha razhladaje sudździa Lina Barodzič. Aktyvistu pahražaje štraf da 50 bazavych vieličyń. U sudzie Maksim Viniarski zajaviŭ, što nia ličyć vykarystanaje im na adras milicyjanta słova «ŭpyr» abrazaj i spasłaŭsia na słoŭnik Dala. «Pavodle Dala, vampir, ci ŭpyr — heta žorstki, zły čałaviek», — skazaŭ Maksim Viniarski. Nibyta hetak jon acaniŭ dziejańni milicyjanta, pakolki toj admaŭlaŭsia davać praŭdzivuju infarmacyju pra miesca znachodžańnia aryštavanaha Leanida Kułakova.
Siońnia milicyjant Lesica ŭ sud nie źjaviŭsia. Z hetaj pryčyny sudździa Barodzič abviaściła ŭ pracesie pierapynak. Sud praciahniecca zaŭtra, 21 traŭnia. Maksim Viniarski chadajničaje ab praviadzieńni linhvistyčnaj ekspertyzy adnosna słova «ŭpyr». Hetaje chadajnictva sudździa musić razhledzieć, kali praces adnovicca.