Biełaruś vystupaje za niekanfrantacyjny charaktar Uschodniaha partniorstva z pazityŭnym paradkam dnia — tak prakamientavaŭ pres-sakratar MZS Dźmitryj Mirončyk infarmacyju pra toje, što na Ryžskim samicie Uschodniaha partniorstva Biełaruś nibyta maje namier błakavać padpisańnie vynikovaha dakumienta.
Navinu ab tym, što Biełaruś i Armienija błakujuć padpisańnie vynikovaj dekłaracyi z-za najaŭnaści ŭ joj frazy pra anieksiju Kryma, raspaŭsiudziła ahienctva Rejter sa spasyłkaj na jeŭrapiejskuju dypłamatyčnuju krynicu.
«Praca nad tekstam dekłaracyi praciahvajecca. Što datyčycca pazicyi Biełarusi, to jana dobra viadomaja. My vystupajem za niekanfrantacyjny charaktar Uschodniaha partniorstva z pazityŭnym paradkam dnia, u tym liku i dla «susiedziaŭ susiedziaŭ», — zajaviŭ Mirončyk.
Samit Uschodniaha partniorstva pačniecca ŭ Ryzie siońnia viečaram niefarmalnaj viačeraj kiraŭnikoŭ delehacyj i praciahniecca 22 maja. Pavodle jaho vynikaŭ płanujecca pryniaćcie sumiesnaj dekłaracyi. Biełaruś na samicie budzie pradstaŭlać ministr zamiežnych spraŭ Uładzimir Makiej.
Prajekt ES «Uschodniaje partniorstva» stvorany z metaj raźvićcia intehracyjnych suviaziaŭ Jeŭrasajuza z šaściu krainami byłoha SSSR — Armienijaj, Azierbajdžanam, Biełaruśsiu, Hruzijaj, Małdovaj i Ukrainaj.
