Ceny na sučasnyja ofisnyja płoščy na druhasnym rynku Minska źnizilisia z pačatku hoda prykładna na 20%, paviedamiła kiraŭnik prajektaŭ pa administracyjnaj nieruchomaści kampanii «Tvaja stalica. Nieruchomaść dla biźniesu» Natalla Novikava.
Pavodle jaje słoŭ, «lišak ofisnych płoščaŭ i nizki ŭzrovień popytu robiać nacisk na ŭzrovień cen». Najbolš źnižajecca cana na administracyjnyja abjekty C-kłasa, jakija zvyčajny adstajuć ad inšych biźnies-centraŭ u jakaści i miescaraźmiaščeńni. Ich ułaśniki vymušanyja źnižać ceny, kab pryciahnuć pakupnikoŭ. U vyniku z pačatku hoda siaredniaja cana prapanovy takich abjektaŭ źniziłasia bolš jak na 20% — da 1.740 dołaraŭ za 1 kv. mietr z PDK.
Ekśpiert adznačyła, što biźnies-centry kłasa B taksama adčuvajuć ciažkaści z pryciahnieńniem pakupnikoŭ — ceny na ich u siarednim źnizilisia na 14%. Ciapier za ofisnyja pamiaškańni ŭ takich abjektach prosiać u siarednim 2.030 dołaraŭ za 1 kv. m. «Pry hetym u B-kłasie sabranyja roznyja abjekty — ad standartnych ofisnych budynkaŭ u spalnych rajonach da ŭnikalnych kompleksaŭ z udałym miescaraźmiaščeńniem i aryhinalnaj kancepcyjaj», — adznačyła Novikava.
Ceny ździełak prykładna na 10-15% nižejšyja za prapanovu. Košt dla abjektaŭ kłasa V znachodzicca ŭ dyjapazonie 1.850—1.900 dołaraŭ za 1 kv. mietr z PDK, kłasa S — 1.500—1.550. «Pry hetym usio bolš ułaśnikaŭ prychodziać da rynkavych cen, tamu pamier siaredniaha dyskontu budzie pastupova źnižacca», — adznačyła ekśpiert.
«U Minsku źjavilisia raniej niecharakternyja dla rynku prapanovy. Asobnyja zabudoŭščyki, jakija majuć adrazu niekalki abjektaŭ, hatovyja pradavać ofisnyja płoščy praktyčna pa sabiekošcie, robiačy staŭku nie na maržu, a na abjomy prodaž. Pakazalny prykład biźnies-centra B-kłasa «Arłan», u jakim pierad adkryćciom ceny źnizilisia na tracinu — da 1.340 dołaraŭ. Rynak ciapier na baku pakupnika, i deviełapiery heta ŭśviedamlajuć», — adznačyła Novikava.
Pavodle jaje słoŭ, «na rynku źlohku ažyvilisia pakupniki — kampanii nabyvajuć ofisy jak dla ŭłasnych patreb, tak i ź inviestycyjnymi metami». «Ciapier, kali ofisnyja pamiaškańni prykmietna patańnieli, nabyvać ich stała bolš vyhadna. Praz paŭtara-dva hady ceny pavinny pajści ŭvierch, a za hety čas možna atrymlivać stabilny rentny dachod. Padahravaje cikavaść šyroki vybar ofisaŭ na luby hust i kašalok», — ličyć kiraŭnik prajektaŭ.
Źmieny zakranuli i dolevaje budaŭnictva biźnies-centraŭ u Minsku, skazała Novikava. Asnoŭnaja tendencyja — zbližeńnie cen na abjekty kłasaŭ B i C. Na pačatkovych etapach budaŭnictva jany blizkija, a na apošnich stadyjach roźnica składaje ŭsiaho 12%. «Siońnia dolniki addajuć pieravahu pamiaškańniam u biźnies-centrach B-kłasa. Uvachodzić u dolevaje budaŭnictva ofisaŭ kłasa S stała mienš vyhadna», — źviarnuła ŭvahu ekśpiert. Ceny dla dolnikaŭ zaraz varjujucca ad 1.300 da 2.500 z PDK za 1 kv. mietr u zaležnaści ad abjekta.
Usiaho ŭ Minsku budujecca pryblizna 30 biźnies-centraŭ, amal 50% jakich adnosiacca da kłasa V. Siarod najbolš cikavych abjektaŭ — 26-paviarchovy ofisny budynak u MFK «Tytan», biźnies-centr sa SPA Riviera Plaza, «Arłan», Kiroff, a taksama kompleksy Mercure i Premier Palace. Usio bolš abjektaŭ spałučajuć ofisnuju prastoru z handlovymi, zabaŭlalnymi abo rekreacyjnymi płoščami, što pavyšaje ich pryvabnaść, sadziejničaje farmiravańniu pazityŭnaha imidžu, adznačyła ekśpiert.
Usio bolš biźnies-centraŭ u Minsku budujecca adzinym ułaśnikam z nastupnaj zdačaj u arendu. «Heta śviedčyć pra rost prafiesijnaha ŭzroŭniu deviełapieraŭ, jakija mohuć vytrymać vysoki termin akupnaści. Drobnyja firmy, jakija žyvuć ad prajekta da prajekta, vymušanyja raźvivacca abo sastupać miesca bolš paśpiachovym kampanijam», — padsumavała pradstaŭnik «Tvajoj stalicy».
