Ustaloŭka soniečnaj batarei ŭ Ryčmandzie, Kalifornija. Fota: Michael Macor, The Chronicle
U Kalifornii, ZŠA, kampanii, što zabrudžvajuć navakolnaje asiarodździe, apłociać ustaloŭku soniečnych batarej biednym žycharam štatu, piša Motherboard.
Kala 1600 haspadarak atrymajuć da kanca nastupnaha hoda biaspłatnyja soniečnyja batarei, što dazvolać im zekanomić na apłacie elektraenierhii ad 400 da 1000 dalaraŭ na hod. Za batarei zapłociać kampanii, što zabrudžvajuć pavietra.
Za biednych prymajucca tyja, čyje haspadarki pryznanyja štatam haspadarkami ŭ niavyhadnym stanoviščy, i čyj prybytak nie pieravyšaje 80% siaredniaha prybytku pa rajonie, tłumačyć SFGate. Im batarei dastanucca biaspłatna, ale pry ŭmovie dapamohi mantažnikam va ŭstaloŭcy — nie pracaj, dyk abiedam.
Zhodna z zakonam štatu pra handal emisijnymi kvotami, kalifarnijskija kampanii musiać płacić za kožnuju tonu škodnych vykidaŭ u atmaśfieru, častka z hetych vypłat musić iści na źmianšeńnie škodnych vykidaŭ.
Častku sabranych takim čynam hrošaj, 14,7 młn dalaraŭ niekamiercyjnaja kampanija Grid Alternatives prapanavała skiravać na dalejšaje źmianšeńnie škodnych vykidaŭ praz dapamohu ŭ pierachodzie na soniečnuju enierhiju tym, chto nie tolki nie zadumaŭsia by ab hetym, ale i maje ciažkaści z apłataj elektraenierhii z tradycyjnych krynic.
Vydańnie nie biez zachapleńnia adznačaje, što heta nie dabračynnaść, a pradumanaja schiema: kampanii nie prosta płociać za zabrudžańnie pavietra, ale i dapamahajuć źmienšyć škodu pryrodzie. Da taho ž, u adroźnieńnie ad tradycyjnaha handlu kvotami na zabrudžańnie, kampanii nie zmohuć zarabić na pieraprodažy «prava psavać pavietra». Ale takaja sistema stanie nasamreč karysnaj, kali budzie lepš finansavanaj, bolš pašyranaj hieahrafična, a taksama stanie pastajannaj — jak pastajannym maje stać rost cen na škodnyja vykidy.
Čytajcie taksama: Francyja prymusiła supiermarkiety addavać ježu biednym
