Viačka Cieleš
Siońnia ŭ Nacyjanalnaj biblijatecy Biełarusi prezientavali čarhovaje vydańnie knihi Viački Cieleša «Harady Biełarusi na starych paštoŭkach».
Kniha vyjšła ŭ kancy 2014 hoda ŭ vydaviectvie «Biełaruś» nakładam 1200 asobnikaŭ. U knizie sabranyja i katałahavanyja niekalki sotniaŭ starych paštovak z vyjavami haradoŭ Biełarusi. Kniha taksama raskazvaje cikavyja fakty, źviazanyja z budynkami na paštoŭkach, i ci isnujuć hetyja budynki ciapier.
Viačka Cieleš patłumačyŭ, što stvareńnie knihi «Harady Biełarusi na starych paštoŭkach» — łahičny praciah jaho knihi «Minsk na starych paštoŭkach», vydadzienaj u 1984 hodzie. Na vydańnie «Minsk na starych paštoŭkach» jaho, zaŭziataha fiłakartysta, padšturchnuŭ Adam Maldzis.
Na žal, ad usiaho nakładu zastałosia litaralna niekalki ekzemplaraŭ — knihu dobra kuplajuć. Adnak jaje jašče možna znajści ŭ Biełaruskich kniharniach.
Cieleš raskazaŭ i pra svoj inšy tvor — knihu-radavod «Adsiul naš rod, tut moj pryčał» pra rod Cielešaŭ, jakija pachodziać z pasiołka Krasnasielski. Dla padrychtoŭki vydańnia Cieleš znajšoŭ infarmacyju pra paŭsotniu svajakoŭ-Cielešaŭ, jakija ciapier žyvuć u roznych kutkach śvietu. Knihu nielha kupić — bolšuju častku Viačka Cieleš razasłaŭ svajakam.
Mastak i piśmieńnik Viačka Cieleš naradziŭsia ŭ 1938 hodzie ŭ pasiołku Krasnasielski. Jon žyvie ŭ Ryzie, ale aktyŭna padtrymlivaje suviaź ź Biełaruśsiu. Cieleš źjaŭlajecca staršynioju supołki mastakoŭ-biełarusaŭ Bałtyi «Maju honar» i namieśnikam staršyni tavarystva biełaruskaj kultury ŭ Łatvii «Śvitanak».
Syn Jakuba Kołasa Michaś Mickievič.
Aleś Kamocki.
Michaś Skobła redahavaŭ knihu «Adsiul naš rod, tut moj pryčał».
Staršynia Zadzinočańnia biełarusaŭ śvietu «Baćkaŭščyna» Alena Makoŭskaja.
U mini-łatarei razyhrali try asobniki knihi-radavoda Cieleša.
Viadučy Usievaład Ścieburaka.
