28 maja ŭ Biełharodskaj vobłaści Rasii prajšła carkoŭnaja słužba z abrazom «Maci Božaja Dziaržaŭnaja», na jakoj namalavany Iosif Stalin z savieckimi maršałami vakoł jaho. Dadzienaje paviedamleńnie vyklikała burnuju reakcyju ŭ ŚMI. Biełharodskaja mitrapolija, kamientujučy padzieju, paviedamlaje nastupnaje.
«14 maja ŭ miežach Biełharodskaj mitrapolii adbyŭsia plenum Sajuza piśmieńnikaŭ Rasii, udzieł u jakim pryniaŭ piśmieńnik, publicyst i hramadski dziejač Alaksandr Prachanaŭ. Alaksandr Andrejevič unios u zału pasiadžeńnia vyjavu hienieralisimusa Stalina ŭ atačeńni vajenačalnikaŭ, jakuju mnohija tut ža achryścili «ikonaj», — paviedamlajecca na aficyjnym sajcie mitrapolii.
— I choć karcina napisanaja ŭ «ikanapisnym styli», usio ž, pa šerahu pryčyn, abrazom jana ličycca nie moža. Pa-pieršaje, nichto z namalavanych na joj histaryčnych piersanažaŭ nie pryličany Ruskaj Pravasłaŭnaj Carkvoj da liku śviatych. Pa-druhoje, niekatoryja ź piersanažaŭ na dadzienaj karcinie byli adkrytymi hanicielami Carkvy.
Karcina, napisanaja pa zamovie Izborskaha kłuba mastakami z horada Rybinska, źjaŭlajecca svojeasablivym manifiestam i ilustracyjaj idej tak zvanaj «hramadzianskaj relihii», jakaja supraćstaić abjaŭlenaj relihii i Pravasłaŭnaj carkvy.
Što ž tyčycca zhadanaha nabaženstva, to paminalnuju lityju ździejśniŭ «Afonski ijeramanach Afinahien» (jak jaho pradstaŭlajuć), jaki źjaŭlajecca «kišennym» ijeramanacham spadara Prachanava i nie naležyć da kliru Biełharodskaj mitrapolii.
Dadzienaja akcyja, praviedzienaja ŭ dni śviatkavańnia 70-hodździa Vialikaj Pieramohi na Trecim ratnym poli Rasii, nie znajšła padtrymki siarod udzielnikaŭ i haściej uračystaściaŭ, jakija vykazali svajo ździŭleńnie i kryŭdu z nahody naviazvańnia im psieŭdarelihijnych pohladaŭ».
