fota Siarhieja Hudzilina
Siońnia, 1 červienia, stanie viadoma imia pieramožcy litaraturnaj Premii imia Ježy Hiedrojca. Premija prysudžajecca štohod za najlepšuju knihu, napisanuju na biełaruskaj movie, u žanrach «mastackaja proza» i «eseistyka».
Uračystaść projdzie ŭ «Renienans-hateli», pačniecca a 19-j hadzinie.
U šort-list uvajšli šeść knih (u ałfavitnym paradku):
1. Taćciana Barysik. Žančyna i leapard. — Minsk: «Knihazbor»
2. Alhierd Bacharevič. Dzieci Alindarki. — Minsk: «Halijafy»
3. Anton Francišak Bryl. Jan Jałmužna. — Minsk: «Knihazbor»
4. Andrej Hucaŭ. Kniha zdaniaŭ. — Minsk: «Knihazbor»
5. Siarhiej Dubaviec. Sini karabiel u błakitnym mory płyvie. — Minsk: «Kaŭčeh»
6. Viktar Kaźko. Čas źbirać kości. — Minsk: «Knihazbor».
Žury składajecca z vaśmi čałaviek: Uładzimir Arłoŭ, Ihar Babkoŭ, Małhažata Buchalik, Adam Hłobus, Hanna Kiślicyna, Andrej Fiedarenka, Cichan Čarniakievič, Hanna Jankuta, jany i abvieściać łaŭreataŭ premii.
Siońnia budzie nazvana try ščaśliŭčyki: III miesca aznačaje tvorčuju stypiendyju ŭ Vientśpiłsie, II miesca — pierakład knihi na polskuju movu abo tvorčaja stypiendyja ŭ Viśbiu (Šviecyja). I miesca — ček na sumu, jakuju vyznačaje «Ideja Bank».
Arhanizoŭvajuć konkurs Biełaruski PEN-centr, Sajuz biełaruskich piśmieńnikaŭ, Pasolstva Respubliki Polšča ŭ Biełarusi, Polski instytut u Minsku; fundatar uznaharody — «Ideja Bank».
Papiarednimi łaŭreatami premii Hiedrojca byli Pavieł Kaściukievič («Zbornaja Respubliki Biełaruś pa niehałoŭnych vidach sportu», 2012), Uładzimir Niaklajeŭ («Aŭtamat z haziroŭkaj ź siropam i biez», 2013), Ihar Babkoŭ («Chvilinka. Try historyi», 2014)
Pry kancy minułaha tydnia premii ŭźnik nievialiki skandał. Polskaja siabroŭka žury Marharyta Buchalik zapatrabavała źniać z sajta premii recenziju Maryi Martysievič na Viktara Kaźko.
«Kniha była abranaja žury premii adnoj z najlepšych knih hoda, a heta aznačaje, što acenki siabroŭ žury całkam razychodziacca z acenkami spadaryni Martysievič. Admoŭnaja recenzija, źmieščanaja na aficyjnym sajcie premii, supiarečyć asnoŭnaj mecie premii — pramocyi mienavita najlepšych knih. Ja liču, što aficyjny sajt premii pavinien nabližać ich da čytača, a nie stanavicca polem zmahańnia i rastłumačvańnia siabram žury ichnich abaviazkaŭ», — napisała Buchalik u adkrytym liście, adpraŭlenym u PEN-Centr i ŚMI.