2 červienia fatohraf Anton Matolka raspavioŭ u svaim błohu pra «biełaruskuju Isłandyju» — miesca niepadalok ad Salihorska, u jakim terykony (rukatvornyja hory z adchodaŭ vytvorčaści) stvarajuć «kaśmičnyja piejzažy». Śviežyja zdymki z hetych miescaŭ chutka nabrali papularnaść u siecivie.
Pa słovach Matolki, adnoj ź pieršych dziŭnaje miesca dla šyrokaj publiki ŭ vieraśni 2014 adkryła fatohraf Hanna Ivanova, apublikavaŭšy fotaspravazdaču pra pajezdku ŭ svaim błohu. Jana raspaviała, što vypadkova ŭbačyła «dziŭnyja hory» z «atrutnych adchodaŭ» niekalki hadoŭ tamu, kali jechała pa trasie, jakaja złučaje pamiž saboj Minsk i Homiel, a zatym vyrašyła viarnucca da ich. Historyju pajezdki jana supravadziła niekalkimi dziesiatkami fotazdymkaŭ.
Salanyja advały ŭ Salihorsku mohuć dasiahać vyšyni ŭ 120 mietraŭ (na ŭzroŭni 40-paviarchovaha doma). Prachod u zonu, dzie Ivanova zrabiła svaje zdymki, zabaronieny, adnak prabracca ŭ hetyja miescy ŭsio ž mahčyma, pierachitryŭšy vartaŭnika, i jany pryciahvajuć da siabie ŭsio bolš turystaŭ.
Svoj zapis pra «biełaruskuju Isłandyju» Matolka supravadziŭ bolš śviežymi majskimi zdymkami fatohrafa Julii Šurmialovaj, zroblenymi na smartfon.
Papularnaści «biełaruskaj Isłandyi», piša Matolka, papiaredničała papularnaść «biełaruskich Maldyvaŭ» — krejdavych karjeraŭ ŭ vytvorčaj zonie AAT «Krasnasielskbudmateryjały». U tuju zonu ŭłady stroha zabaranili ŭjazdžać turystam i navat razburyli asfaltavanuju darohu, jakaja dazvalaje dabracca da jaje chutčej.
Matolka ličyć, što z «Isłandyjaj» moža adbycca toje ž samaje. Tym nie mieniej fatohraf nie pakidaje nadziei, što miesca ŭsio ž pasprabujuć zrabić turystyčnaj zonaj.
