Mahčymaści Fondu sacyjalnaj abarony nasielnictva (FSAN) nie dazvalajuć sioleta pavyšać piensii, paviedamiła kiraŭnik fondu Ludmiła Bačyła, vystupajučy 8 červienia na pašyranym pasiadžeńni pastajannaj kamisii Pałaty pradstaŭnikoŭ pa biudžecie i finansach.
Jana zaznačyła, što letaś pracoŭnyja piensii pavyšalisia trojčy: na 5, 7 i 5,5%. Sioleta ž zarabotnaja płata nie vyrasła nastolki, kab možna było pavysić pracoŭnyja piensii.
«Situacyja niaprostaja, piensijaniery chočuć pavyšeńnia piensij. Jany pryvykli da štokvartalnaha pieraraźliku piensij. Na žal, finansavyja mahčymaści nie dazvalajuć heta rabić», — zajaviła Bačyła.
Na jaje dumku, dalejšaja situacyja šmat u čym budzie zaležać ad taho, «jak budzie pavodzić siabie siaredniaja zarpłata». Kiraŭnik FSAN zaznačyła, što pry najaŭnaści mahčymaściaŭ rašeńni ab pieraraźliku pamieru pracoŭnych piensij mohuć być pryniatyja. Pra hetym Bačyła nahadała, što zhodna z zakanadaŭstvam pieraraźlik piensij pravodzicca ŭ vypadku, kali siaredniaja zarpłata za kvartał vyrasła bolš jak na 15%.
Siaredniaja zarpłata ŭ krasaviku skłała 6,53 młn. rubloŭ. Ciapierašniaha ŭzroŭniu jana dasiahnuła ŭ siaredzinie minułaha hoda i na praciahu nastupnych miesiacaŭ vahałasia ŭ miežach 6—6,5 młn. rubloŭ.
U siaredzinie 2014 hoda ŭrad pryniaŭ rašeńnie, zhodna ź jakim rost zarpłat na dziaržaŭnych pradpryjemstvach uviazany z dynamikaj pradukcyjnaści pracy. Z-za hetaha rost zarpłat u realnymi siektary ekanomiki spyniŭsia.
