Niadaŭna biełaruski rubiel znoŭ pabiŭ histaryčny rekord: kali nie ličyć denaminacyi-2000, za dalar jašče nie davali bolš za 15,5 tysiač.
«Padaje i padaje, dy kali jon ros?» — možna pačuć ad ludziej. A jon ros.
Jašče niadaŭna, ź lutaha pa siaredzinu maja, biełaruski rubiel stabilna ros da dalara. Z 15 450 kurs dalara źniziŭsia da 14 040, ale zatym raźviarnuŭsia i dajšoŭ da ŭčorašnich rekordnych 15 488 rubloŭ za dalar.
Rubiel niaznačna i niadoŭha ros paśla kryzisu 2011 hoda — ź listapada-2011 (8 850 za dalar) pa maj-2012 (8 010), a taksama čas ad času ŭ 2009—2010 hadach (praŭda, u miežach vahańniaŭ na ±5%).
Doŭhi pieryjad sapraŭdnaj stabilnaści i navat niaznačnaha rostu kursu rubla da dalara prychodziacca na 2005-2007 hady. Tady ŭsie viedali na pamiać liki 2 150, a zatym i 2 140.
Praŭda, paśla elehantnych vybaraŭ 2006 hoda vałavy zamiežny doŭh Biełarusi pajšoŭ u zaŭvažny (i niaspynny) rost, a ŭ chutkim časie skončyłasia pałasa stabilnaści biełaruskaha rubla.
Na samoj spravie, vyznačać kurs rubla tolki pa dalary nie zusim karektna — paśla navahodniaj devalvacyi 2009 hoda Nacbank pierajšoŭ na pryviazku rubla da košyku valut (dalar, jeŭra, rasijski rubiel). Tym nie mieniej, da košyku rubiel z taho času nie asabliva ros.
Ad pačatku svajho isnavańnia da siońniašniaha dnia biełaruski rubiel patańnieŭ bolš čym u 100 tysiač raz.
Z 2000 hoda biełaruski rubiel staŭ tańniejšy ŭ amal 50 raz, z 320 rubloŭ za dalar da siońniašnich 15,5 tysiač. Kali ž ličyć z 1995 hoda (uličvajučy denaminacyju-2000), — u 1332 razy. A kali ź jaho ŭviadzieńnia ŭ abarot letam 1992-ha — va ŭsie 119 tysiač raz.
Hladzicie taksama: Biełaruskija talery: fantazija «Našaj Nivy»
