Ser Krystafier Li ŭ roli Sarumana ŭ tryłohii «Chobit»
Anhlijski akcior ser Krystafier Li pamior u niadzielu, 7 červienia ŭ špitali Čełsi i Vestminstara (Vialikabrytanija), paviedamlaje Daily Telegraph sa spasyłkaj na siamju akciora. U špitali jon try tydni prachodziŭ lekavańnie ad reśpiratornych prablem i sardečnaj niedastatkovaści. Jaho žonka adkłała publičnaje abviaščeńnie da taho, pakul nie paviedamić usim rodzičam ab śmierci muža.
Za 93 hady žyćcia ser Krystafier Li vykanaŭ roli šerahu kultavych złodziejaŭ: Sarumana va «Uładary Piarścionkaŭ» i «Chobicie» dy hrafa Duku ŭ «Zornych Vojnach», hrafa Drakuły, Raspucina dy voraha Džejmsa Bonda ŭ «Čałavieku z załatym pistaletam».
Taksama jon vykanaŭ rolu Šerłaka Chołmsa ŭ filmie 1962 hoda, zatym brata Šerłaka ŭ 1970-m. Ahułam jaho filmahrafija naličvaje dźvie sotni poŭnamietražnych stužak i šeść dziasiatkaŭ telefilmaŭ i sieryjałaŭ. Rola Sarumana ŭ «Chobit. Bitva Piaci vojskaŭ» stała adnym z apošnich jaho źjaŭleńniaŭ na ekranie.
Akramia kino ser Krystafier Li zajmaŭsia ciažkoj muzykaj: na jaho rachunku čatyry poŭnafarmatnych mietał-albomy, try mini-albomy i try sinhły, u tym liku dźvie składanki piakielnych kaladnych piesień. Apošnija zapisy vydadzienyja ŭ 2014 hodzie.
