«Niahledziačy na ciažkaści, praź jakija my prajšli za apošnija paru hadoŭ, my pavinny być aptymistami. Pieršyja kroki, jakija my nazirajem zaraz u EHU – praca nad stvareńniem misii, stratehii, praca nad biudžetam, – vielmi abnadziejvajuć», – skazaŭ Frederyk Koen, kiraŭnik apieracyjnaha adździeła Pradstaŭnictva Jeŭrapiejskaha Sajuza ŭ Biełarusi, na Asamblei Trastavaha fondu EHU, paviedamlaje pres-słužba VNU.
ehu.lt
«My pavinny dać mandat univiersitetu i Kiraŭničaj radzie, kab nakiravać EHU ŭ patrebnaje rečyšča, kab zrabić jaho ŭstojlivym univiersitetam, i Jeŭrapiejski Sajuz, biezumoŭna, hatovy padtrymać vas u hetym», – skazaŭ Koen.
Trastavy fond Jeŭrapiejskaha humanitarnaha ŭniviersiteta pravioŭ svoj vośmy štohadovy Schod Asamblei donaraŭ 4 červienia 2015 h. u Vilni. Bolš za 60 udzielnikaŭ abmierkavali biahučuju situacyju i budučyniu EHU.
«Kiraŭničaja rada pavinna zrazumieć dušu hetaha ŭniviersiteta, i prymajučy rašeńni, jany pavinny ŭličvać palityčnyja nastupstvy jašče bolš pilna, čym jany heta rabili da hetaha času. Donary ŭniviersiteta pavinny abjadnacca i stać za hetym prajektam razam. U Radzie Ministraŭ Paŭnočnych krain jość ideja bolš ščylnych kantaktaŭ donaraŭ. Nieabchodna nie tolki sustrakacca na Asamblei donaraŭ raz za hod, ale i abmiarkoŭvać na praciahu ŭsiaho hoda pytańni stratehii raźvićcia ŭniviersiteta», – adznačyŭ Kienet Broman, kiraŭnik Upraŭleńnia Hienieralnaha sakratara pry Radzie Ministraŭ Paŭnočnych krain.
Rektar EHU Dejvid Polik pradstaviŭ płan ahulnaha raźvićcia EHU i zadačy, u tym liku retraśpiektyŭny pohlad na 2014-2015 navučalny hod, śpis abaviazkaŭ Kiraŭničaj rady, praces restrukturyzacyi i stratehičnaha płanavańnia ŭniviersiteta, ahlad misii ŭniviersiteta, pryncypy instytucyjnaha finansavańnia, biudžet i mety na 2015-2016 navučalny hod.
Mieniedžar Trastavaha fondu EHU Mads Majniert pradstaviŭ abnoŭlenuju infarmacyju ab finansavym stanoviščy Trastavaha fondu EHU: biahučaje finansavaje stanovišča, raźvićcio z času minułaj sustrečy Asamblei, papraŭki ŭ terminy i krynicy finansavańnia ŭ budučyni.
«Ja ŭpeŭnieny, što my atrymajem dobry stratehičny płan i zbałansavany biudžet EHU. Zbałansavany biudžet i našy pravilnyja dziejańni pryviaduć nas u patrebnaje rečyšča. My pavinny adnavić davier donaraŭ, tamu što było šmat dezinfarmacyi i nieparazumieńniaŭ unutry i za miežami supolnaści donaraŭ. My paćviardžajem našu prychilnaść EHU», – padsumavaŭ Mads Majniert, mieniedžar Trastavaha fondu EHU.
Trastavy fond EHU źjaŭlajecca niezaležnym orhanam, stvoranym u adpaviednaści z mandatam Jeŭrapiejskaj kamisii i adkaznym za kiravańnie i kantrol achviaravańniaŭ u biudžet univiersiteta. Jon pracuje ŭ ciesnym supracoŭnictvie ź EHU dla zabieśpiačeńnia achviaravańniaŭ va ŭniviersitet. Prykładna dźvie traciny biudžetu EHU finansujecca za košt achviaravańniaŭ u Trastavy fond EHU, jaki robić dastupnym adukacyju ŭ EHU dla studentaŭ ź Biełarusi.
Udzielniki Asamblei donaraŭ taksama arhanizavali sustreču ŭ kampusie ŭniviersiteta sa studentami EHU i vykładčykami, dzie jany abmianialisia dumkami i zładzili dyskusiju.
Pierad Asamblejaj donaraŭ adbyłosia pasiadžeńnie Kiraŭničaj rady ŭniviersiteta, dzie byŭ pradstaŭleny pramiežkavy dakład ab prajekcie biudžetu na 2015/2016 navučalny hod, administracyjnym pracesie restrukturyzacyi, pracesie stratehičnaha płanavańnia; pradstaŭlena misija ŭniviersiteta, abvieščanyja papiarednija ŭmovy dla viartańnia EHU ŭ Biełaruś, abmierkavana studenckaje pradstaŭnictva ŭ Kiraŭničaj radzie i inšyja pytańni.
Nastupnaja Asambleja Trastavaha fondu EHU adbudziecca ŭ červieni 2016 hoda.
