Biełaruś hatova adyhrać značnuju rolu ŭ raźvićci mižnarodnaha spartyŭnaha ruchu, zajaviŭ Alaksandr Łukašenka padčas sustrečy 13 červienia ŭ Baku z prezidentam Mižnarodnaha alimpijskaha kamiteta Tomasam Bacham.
«My členy jeŭrapiejskaj siamji. Jeŭropa — naš ahulny dom. Tamu nam daviadziecca, jak krainie maładoj i ambicyjnaj, adyhryvać adpaviednuju rolu, u tym liku i ŭ sporcie. Tym bolš što sport — heta naš pryjarytet u krainie», — cytuje Łukašenku jaho pres-słužba.
«Našy pryncypy, jakija my spaviadajem u palitycy, vielmi suhučnyja pryncypam, jakija spaviadaje Mižnarodny alimpijski kamitet. My absalutna internacyjanalnaja, šmatkanfiesijnaja, šmatnacyjanalnaja kraina, dzie ŭsie žyvuć u miry i zhodzie»,— padkreśliŭ biełaruski kiraŭnik.
Łukašenka prapanavaŭ MAK bolš nadavać uvahi raźvićciu sportu ŭ tych krainach, jakija raźvivajucca ŭ hetym kirunku. «Tak, u nas jość ahulnapryznanyja lidary ŭ suśvietnym sporcie, ale treba padtrymlivać krainy, jakija raźvivajucca. Viedaju, što takija idei ŭ MAK isnujuć. My hatovy z vami razam pracavać na praktycy, kab hetaj idei nadać bolšy dynamizm», — skazaŭ jon.
Kiraŭnik dziaržavy taksama padziakavaŭ Tomasu Bachu za tuju rolu, jakuju jon adyhryvaje ŭ mižnarodnym alimpijskim ruchu i ŭ cełym u mižnarodnym sporcie: «Ja vielmi zadavoleny, što ŭ MAK, pa-pieršaje — śpiecyjalist, a pa-druhoje — čałaviek, jaki žadaje raźvivać sport i sadziejničać hetamu raźvićciu».
U svaju čarhu Tomas Bach adznačyŭ, što rady mahčymaści sustrecca z prezidentam Biełarusi.
«Upeŭnieny, što vy i biełaruskaja kamanda adyhrajuć važnuju rolu ŭ historyi i praviadzieńni pieršych Jeŭrapiejskich hulniaŭ», — skazaŭ jon.
Surazmoŭcy taksama abmianialisia mierkavańniami nakont cyrymonii adkryćcia pieršych Jeŭrapiejskich hulniaŭ, što adbyłasia napiaredadni. Łukašenka zajaviŭ, što «cyrymonija jamu vielmi spadabałasia, usio było arhanizavana spakojna, ale z sensam», paviedamlaje pres-słužba.
«Tam nie było vialikich ambicyj i dla mianie heta vielmi prymalna», — skazaŭ jon.
«Zhodny z vami, što cyrymonija prajšła dastatkova spakojna. U toj ža čas jana niesła simvaličny sens, apisvała historyju krainy», — dadaŭ Bach.
Paśla zaviaršeńnia sustrečy Alaksandr Łukašenka ŭručyŭ prezidentu MAK orden Nacyjanalnaha alimpijskaha kamiteta Biełarusi «za vyklučnyja zasłuhi ŭ raźvićci alimpijskaha ruchu, masavaha sportu i sportu vyšejšych dasiahnieńniaŭ u Biełarusi, a taksama za asablivyja zasłuhi ŭ prapahandzie ideałaŭ i pryncypaŭ alimpizmu, papularyzacyi sportu i zdarovaha ładu žyćcia», paviedamlaje pres-słužba.
