Bolš za čatyry hady spatrebiłasia byłomu rabočamu AAT «Homielski chimzavod» Alaksandru Klimavu, kab dabicca ad pradpryjemstva składańnia akta formy N-1 — «Akta ab niaščasnym vypadku na vytvorčaści».
Traŭmu žychar Homiela atrymaŭ na rodnym pradpryjemstvie 19 traŭnia 2011 hoda, a tolki 29 červienia 2015 hoda zavod skłaŭ «Akt ab niaščasnym vypadku na vytvorčaści». Pamiž hetymi datami – čatyry hady, zmarnavanyja na napisańnie skarhaŭ, naviedvańnie ŭstanoŭ kštałtu Homielskaha abłasnoha ŭpraŭleńnia Departamienta dziaržaŭnaj inśpiekcyi pracy i inšych, mnostva sudovych pasiedžańniaŭ. I ŭsio heta dziela taho, kab dakazać vidavočnaje – rabočy atrymaŭ traŭmu na rodnym pradpryjemstvie, u pracoŭny čas, pry vykanańni pracoŭnych abaviazkaŭ.
Na ŭsich etapach baraćby ź sistemaj byłomu rabočamu dapamahaŭ pravaabaronca, pravavy inśpiektar prafsajuzu REP pa Homielskaj vobłaści Leanid Sudalenka.
«Paśla atrymańnia aktu H-1, pa sutnaści, my dabilisia pryznańnia traŭmy vytvorčaj, adpaviedna, zhodna zakonu ab strachavańni, u Alaksandra Klimava źjaŭlajecca mahčymaść źviarnucca ŭ «Biełdziaržstrach», i jon moža atrymać strachavyja vypłaty. Čatyry hady pajšło na toje, kab dakazać vidavočnaje. Ale ja liču, što heta pieramoha Alaksandra Klimava nad usioj sistemaj. Adzin čałaviek pakazaŭ, što kali nie śpiašacca pryznavać svaju parazu i zmahacca ź sistemaj, to u pryncypie možna atrymać pazityŭny vynik», - prakamientavaŭ pravaabaronca.
Sam były rabočy navat nie viedaje – radavacca jamu ci žurycca zaraz.
«Bo jašče nieviadoma, što budzie z vypłatami, i akt tak składzieny, što nie paznačana ničyja vina za toje, što ja zastaŭsia invalidam. Da zaklučeńnia nie prykłali nivodnaha dakumienta», - adznačyŭ Alaksandr Klimaŭ.
Historyja pačałasia ŭ traŭni 2011 hoda. Aparatčyk abpału AAT «Homielski chimzavod» Alaksandr Klimaŭ, znachodziačysia na pracoŭnym miescy, zajšoŭ na estakadu razhruzki, adčuŭ pach siery, straciŭ prytomnaść i ŭpaŭ z vyšyni. Jon atrymaŭ šmatlikija traŭmy, pierałomy rebraŭ, razryŭ ŭłonnaha sučlanieńnia, traŭmatyčny simfizit. Ale na pradpryjemstvie byŭ składzieny akt ab nievytvorčaj traŭmie. Najmalnik spasłaŭsia na miedycynskaje zaklučeńnie zavadskoha miedpunkta ab tym, što pryčynaj nieprytomnaści staŭ «chvaravity stan», pakolki kaliści pracoŭny źviartaŭsia pa kansultacyju ŭ kardyjałahičny dyspansier z nahody pavyšanaha cisku.
Razam z tym, upraŭleńnie achovy zdaroŭja Homielskaha abłvykankama i Ministerstva achovy zdaroŭja ŭ adkazach na zvaroty Alaksandra Klimava napisali, što mahčymyja pryčyny straty prytomnaści rabotnikam padčas niaščasnaha vypadku dakładnymi miedycynskimi dadzienymi nie paćvierdžanyja i źjaŭlajucca tolki mierkavańniem hałoŭnaha lekara, vykazanyja ŭ mierkavanaj formie. Pracoŭny rehularna prachodziŭ miedycynskuju kamisiju, atrymlivaŭ dopusk da pracy, na ŭliku ŭ kardyjałahičnym dyspansiery nie stajaŭ, a eskułapy lačebnaha ŭčastka chimzavodu spasyłajucca na hipatetyčnyja zdahadki.
Prajšoŭšy etap «kruhoŭ piekła» - mnostva sudovych razhladaŭ, tolki praz čatyry hady, 17 lutaha 2014 hoda Alaksandr Klimaŭ atrymaŭ pastanovu Homielskaha abłasnoha suda, jaki abaviazaŭ Homielskaje ŭpraŭleńnie inśpiekcyi pa pracy skłaści akt formy H-1, heta značyć pryznać traŭmu Alaksandra Klimava vytvorčaj.
