Videahulnia «Lehiendy Ajzienvalda» biełaruskaj kamandy Aterdux Entertainment vyjšła ŭ prodaž u internet-mahazinie Steam 2 lipienia prykładna a 17 viečara pa minskim časie.
Prajekt suśvietnaha kłasu zrabili faktyčna dva prahramisty, art-dyrektar, piśmieńnik i pradziusar. I tak, «Lehiendy Ajzienvalda» dastupnyja na biełaruskaj i jašče piaci movach.
Suśviet hulni nahadvaje realnaje XVI stahodździe ŭ Jeŭropie, ale ź nievialičkimi adroźnieńniami — biez elfaŭ i orkaŭ, ale z kropielkaj čaraŭnictva, u jakoje vieryli ŭ tyja časy. I, viadoma, z prydvornymi intryhami, bratazabojčymi vojnami i zdradami.
Čytajcie padrabiaźniej: «Lehiendy Ajzienvalda» stali pieršaj kampjutarnaj hulnioj pa-biełarusku
Na raspracoŭku chardkornaj sumiesi rolevaj hulni i kłasičnaj pakrokavaj stratehii kala troch tysiač čałaviek achviaravali sumarna 83,5 tysiač dalaraŭ z zapatrabavanych 50 tysiač na Kickstarter. Pahulać u «Lehiendy Ajzienvalda» ŭ «čarnavoj» viersii možna było jašče z kastryčnika 2013 hoda dziakujučy sistemie Steam Greenlight. 73% dobraachvotnych testyroŭščykaŭ pakinuli pazityŭnyja vodhuki pra papiaredniuju viersiju.
Hulnia vyjdzie dla Windows, jana patrabuje prynamsi dvuchiadzierny pracesar na častacie 2 HHc, 2 Hb apieratyŭnaj pamiaci, 1 Hb videapamiaci i 2 Hb na dysku. Cana na Steam — 13 dalaraŭ.
