Słužba biaśpieki Ukrainy (SBU) i ministerstva ŭnutranych spraŭ evakujujuć mirnych žycharoŭ vioski, raźmieščanaj niepadalok ad horada Mukačava, dzie zabłakavanyja bajcy ŭkrainskaha ruchu «Pravy siektar», paviedamlaje Bi-bi-si.
«Uličvajučy niebiaśpieku dla žycharoŭ vioski, […] ažyćciaŭlajecca evakuacyja mirnych hramadzian, u pieršuju čarhu — dziaciej», — havorycca ŭ sumiesnaj zajavie viedamstvaŭ.
U SBU i MUS paćvierdzili hatoŭnaść pačać razzbrajeńnie bajcoŭ «Pravaha siektara» i pravieści zatrymańni. U viedamstvach abiacajuć dastavić usich zatrymanych u Kijeŭ «dla abjektyŭnaha i niepraduziataha rasśledavańnia».
Pradstaŭniki siłavych viedamstvaŭ vykazali nadzieju, što lidar «Pravaha siektara» Dmytro Jaraš akaža ŭpłyŭ na svaich prychilnikaŭ i pierakanaje ich skłaści zbroju.
«U pracesie pieramovaŭ (prychilniki»Pravaha siektara») paviedamili, što hatovyja zdacca, kali da ich źvierniecca Dmytro Jaraš. Tamu SBU i MUS raźličvajuć, što hety narodny deputat zrobić usio, kab pierakanać svaich prychilnikaŭ skłaści zbroju, jakuju nielha ŭžyć tam, dzie niama vajny, dzie žyvuć vyklučna mirnyja ludzi — za tysiaču kiłamietraŭ ad zony ATA i linii sudakranańnia», — havorycca ŭ paviedamleńni.
Napiaredadni ŭ Mukačavie adbyłosia sutyknieńnie z udziełam prychilnikaŭ miascovaha deputata i bajcoŭ «Pravaha siektara». Kanflikt skončyŭsia stralaninaj, u vyniku jakoj zahinuli prynamsi dva čałavieki, dzieviać čałaviek atrymali ranieńni.
Pavodle paviedamleńnia prakuratury, 11 lipienia ŭ Mukačavie uzbrojenyja ludzi ŭ kamuflažnaj formie z nadpisami «Pravy siektar» «z metaj raźmierkavańnia śfier ŭpłyvu pryznačyli sustreču miascovym žycharam u kaviarni», paśla čaho z-za kanfliktu pačałasia stralanina. Pavodle viersii «Pravaha siektara», prychilniki deputata Łańjo «pasprabavali fizična źniščyć» pradstaŭnikoŭ arhanizacyi.
Kamandzir 1-ha zapasnoha bataljona DUK «Pravy siektar» raspavioŭ svaju viersiju pra padziei ŭ Mukačavie. Videa zapisana na mabilny telefon prosta na miescy ŭkryćcia hrupy ad pravaachoŭnikaŭ, paviedamlaje »Ukrainskaja praŭda». Videa ŭ siecivie raźmiaściła pres-słužba Pravaha siektara.
Pa słovach kamandzira zapasnoha bataljona DUK, ich vyklikaŭ na pieramovy miascovy kryminalny aŭtarytet Bluk, u suviazi z tym, što jany patrulavali miažu i pieraškadžali kantrabandzie. Jon taksama paviedamiŭ, što na miescy zdareńnia źjaviŭsia «nieviadomy śpiecnaz», i tady pačałasia stralanina.
Sam Jaraš ŭ «Fejsbuku» napisaŭ, što pierakanany, što jaho prychilniki dziejničali ŭ ramkach samaabarony. Akramia taho, «Pravy siektar» zaklikaje da aryštu tych, kaho jany ličać vinavatymi trahiedyi, a taksama da zvalnieńnia kiraŭnikoŭ pravaachoŭnych orhanaŭ, piša UNIAN.
«Zaklikajem praciahnuć biesterminovyja palityčnyja akcyi da aryštu vinavatych, na dumku «Pravaha siektara», u trahiedyi, Łańjo, Miedviedčuka i adpraŭki ŭ adstaŭku ŭsiaho kiraŭnictva siłavych struktur Zakarpackaj vobłaści i ministra ŭnutranych spraŭ Avakava», — havorycca ŭ zajavie.
Pradstaŭniki MUS Ukrainy raniej paviedamili ab stabilizacyi situacyi ŭ horadzie.
«Na mianie pa telefonie vyjšaŭ kamandzir hrupy zabłakavanych u Mukačovie bajcoŭ z pazyŭnym «Latun»z prośbaj źviazać jaho z kiraŭnictvam antyterarystyčnaha centra SBU dla pieramovaŭ ab spynieńni ŭzbrojenaha supraćstajańnia, akazańni dapamohi paranienym bajcam, — što ja i zrabiŭ nieadkładna», — napisaŭ u «Fejsbuku» pazaštatny daradca ministra ŭnutranych spraŭ, deputat Viarchoŭnaj rada Anton Hieraščanka.
Prychilniki «Pravaha siektara» zładzili akcyi pratestu adrazu ŭ niekalkich haradach Ukrainy ŭ suviazi z padziejami ŭ Mukačavie.
Mitynhi prajšli ŭ Pałtavie, Chiersonie, Ciarnopali, Dnieprapiatroŭsku, Charkavie i Lvovie. U Dnieprapiatroŭsku bolš za 50 prychilnikaŭ arhanizacyi pikietavali budynak abłasnoha ŭpraŭleńnia MUS Ukrainy. U Lvovie la ŭvachodu ŭ abłdziaržadministracyju źjavilisia namioty, a na trasie, jakaja viadzie ŭ Mukačava, ustanoŭlenyja błokposty, kab nie dać mahčymaść prajści vajennaj technicy.
Akcyja pratestu praciahvałasia i la administracyi prezidenta ŭ Kijevie, prychilniki «Pravaha siektara» abviaścili jaje biesterminovaj. Pratestoŭcy patrabujuć adstaŭki ministra ŭnutranych spraŭ Arsiena Avakava.
Pavodle paviedamleńnia deputata Viarchoŭnaj Rady Mustafy Najema, prezident Ukrainy Piatro Parašenka pačaŭ pieramovy ź lidaram «Pravaha siektara» Dmytrom Jarašam.
