Asobnyja rajony Minskaj, Mahiloŭskaj, Homielskaj i Viciebskaj abłaściej źniali zabaronu na naviedvańnie lasoŭ, paviedamili ŭ Ministerstvie lasnoj haspadarki.
Adpaviednaje rašeńnie, pavodle danych viedamstva, pryniali vykankamy Vilejskaha, Babrujskaha, Pietrykaŭskaha, Viciebskaha i Biešankovickaha rajonaŭ.
U suviazi z haračym nadvorjem, jakoje ŭstalavałasia ŭ Biełarusi da niadaŭniaha času, byli zakryty dla naviedvańnia amal usie lasy. Pa stanie na 8 lipienia vyklučeńnie składali tolki Śvisłacki, Mastoŭski, Miadzielski i Vałožynski rajony.
Abmiežavańni i zabarony na naviedvańnie lesu majuć prava ŭstanaŭlivać orhany miascovaj vykanaŭčaj ułady ŭ suviazi z nastupleńniem vysokaj pažarnaj niebiaśpieki ŭ lasach. U pieryjad zabarony zakryvajucca šłahbaumy na źjezdach z daroh u les, pry nieabchodnaści ŭstanaŭlivajucca tablički ź infarmacyjaj ab zabaronie naviedvańnia lesu i adkaznaści za jaje parušeńnie. Vynosiacca rašeńni miascovych orhanaŭ ułady pa abmiežavańni abo poŭnaj zabaronie na naviedvańnie, u tym liku ŭjezd miechaničnych transpartnych srodkaŭ u les i na tarfianiki (akramia technałahičnaha transpartu lashasaŭ). Na aŭtatransparcie ŭ hety čas možna prajazdžać tolki pa darohach, što viaduć da nasielenych punktaŭ, a taksama da dobraŭparadkavanych miesc adpačynku. Raspalvańnie vohnišča ŭ lesie i na tarfianikach na pieryjad zabarony abo abmiežavańnia naviedvańnia lesu zabaroniena.