Pieršy namieśnik staršyni ruchu «Za Svabodu» Juryj Hubarevič vystupiŭ ź inicyjatyvaj praviadzieńnia niezaležnaj ekśpiertyzy pa vyjaŭleńni niesapraŭdnych podpisaŭ hramadzian za vyłučeńnie kandydataŭ u prezidenty, paviedamlaje pres-słužba arhanizacyi.
Pavodle mierkavańnia Hubareviča, stvoranaja dla hetaha hramadskaja kamisija na etapie zboru podpisaŭ stanie alternatyvaj Centrvybarkamu i padkantrolnym jamu rehijanalnym vybarčym kamisijam. Meta stvareńnia kamisii — «nie dapuścić parada kandydataŭ, jakija byli b zarehistravanyja z sumniŭnymi 100 tysiačami podpisaŭ», jak heta było na prezidenckich vybarach 2010 hoda.
Paśla rehistracyi inicyjatyŭnych hrup demakratyčnych kandydataŭ Hubarevič źbirajecca źviarnucca da ich z pytańniem ab hatoŭnaści prajści takuju pravierku podpisaŭ. Pavodle jaho słoŭ, u hramadskuju kamisiju mohuć uvajści pravaabaroncy, niezaležnyja naziralniki, žurnalisty, pradstaŭniki hramadzianskaj supolnaści, lubych demakratyčnych struktur, jakija nie ŭdzielničali ŭ vybarach i nie padtrymlivajuć kaho-niebudź z kandydataŭ.
«U Centrvybarkamie vykazali apasku, što vybary-2015 buduć niecikavymi pry małoj kolkaści kandydataŭ, — adznačyŭ Hubarevič. — Heta aznačaje, što, jak i piać hadoŭ tamu, va ŭłady i jaje apanientaŭ mohuć supaści žadańni rehistravać i rehistravacca luboj canoj, biez sumlennaha pieraadoleńnia padpisnoha cenzu ŭ 100 tysiač podpisaŭ hramadzian».
Jon nahadaŭ, što na vybarach 2010 hoda vykazvałasia šmat sumnieńniaŭ u realnaści zboru 100 tysiač podpisaŭ usimi zarehistravanymi kandydatami ŭ prezidenty. Ciapier, pavodle mierkavańnia Hubareviča, sabrać ich budzie jašče składaniej.
«U realny zbor 100 tysiač podpisaŭ pavinien u pieršuju čarhu pavieryć demakratyčny elektarat. Tolki tady jon zmoža razhladzieć u pretendentach na prezidenctva tych, chto nie źjaŭlajecca statystam ci sparynh-partnioram Łukašenki. Inakš ciapierašniaja apazicyja prajhraje i ŭ maralna-palityčnym płanie ŭ vačach miljonaŭ prychilnikaŭ pieramien. Vybary, jakija i tak ničoha dobraha nie abiacajuć, mohuć naohuł stać dla jaje apošnimi», — skazaŭ jon.
Niezaležnaja pravierka podpisaŭ, ličyć Hubarevič, moža być praviedziena paralelna z anałahičnaj pracaj aficyjnych vybarčych kamisij. U pryvatnaści, padpisnyja listy, jak aryhinały, tak i ksierakopii, mohuć być pravierany ŭ prysutnaści pradstaŭnikoŭ kandydataŭ, a acenka podpisaŭ moža ažyćciaŭlacca decentralizavana — u lubym abłasnym ci bujnym horadzie.
