Płyń turystaŭ, jakija pryjazdžajuć na adpačynak u Biełaruś, źmialeła praz kryzis u Rasii. Adnak patencyjał «cudu niekranutaj pryrody» zastajecca vialikim. Jaho sprabujuć vykarystoŭvać biełaruskija miljaniery. Jakija prajekty jany realizujuć i kolki płaciać u biudžet za arendu lasoŭ i azior?
Voziera Mašenskaha
Voś užo niekalki hadoŭ žychary Bresta narakajuć, što nie mohuć adpačyć na svaim lubym Biełym voziery. Na vadajom, jaki znachodzicca za 35 km ad abłasnoha centra, ich nie puskajuć achoŭniki: maŭlaŭ, pryvatnaja terytoryja.
Ziamloj karystajecca samy viadomy brescki biznesmien — Alaksandr Mašenski, ułaśnik rybnaha «Santa-Bremara» i małočnaha «Savuškavaha praduktu».
Jašče ŭ 1990-ja hetyja 2,5 hiektara vodaachoŭnaj zony Biełaha voziera atrymała Bresckaja rajspažyŭkaapieracyja, adnak u 2008 hodzie pierapradała jaje Mašenskamu, jaki vyrašyŭ zaniacca turystyčnym biznesam.
Elitny hatel Mašenskaha paŭstaŭ prosta siarod lesu
Niepadaloku ad voziera jon pabudavaŭ luksavuju bazu adpačynku «Šale Hrynvud» (možna pierakłaści jak «sielski domik u šviejcarskim styli, pabudavany ŭ zialonym lesie»). Heta dva dziasiatki hatelnych numaroŭ, a taksama restaran italjanskaj kuchni i łaźnia. Za načoŭku haspadary prosiać niamała — $80. Adnak hości zastajucca zadavolenymi. U papularnym internet-katałohu hatelaŭ booking.com «Šale Hrynvud» maje adznaku 9,4 pa 10-balnaj sistemie.
Mašenski narakaŭ, što jamu daviałosia ŭkłaści šmat hrošaj u infrastrukturu. Adnak umovy, na jakich jon letaś atrymaŭ u arendu jašče 8,5 hiektara ziamli, vyhladajuć zvyšvyhadnymi. Za vielizarny abšar lesu z vychadam da voziera biznesmien płacić… kala $110 na miesiac. Damova arendy zaklučanaja na 100 hadoŭ u biełaruskich rublach, takim čynam, inflacyja patrochi źjadaje i hetyja hrošy.
Jacht-kłub Tapuzidzisa
Hrek Pavieł Tapuzidzis, jaki naradziŭsia ŭ Hruzii, taksama ablubavaŭ biełaruskija aziory.
U kancy 2000-ch jon uziaŭsia pabudavać azdaraŭlenčy kompleks na voziery Miadzieł, susiednim z Naračču. Adnak u vyniku atrymałasia tolki niešta padobnaje na pryvatnuju rezidencyju. Adpačyć zvyčajnamu turystu na turystyčnaj bazie Tapuzidzisa nie ŭdasca. Za 90 sotak, adviedzienych dla budaŭnictva, kampanija «Tytuń-Inviest» štohod płacić za ziamlu «,87 USD». Akurat tak, z koskaj na pačatku.
Zatoje inšy turystyčny abjekt Tapuzidzisa, hatel «Robinsan Kłab» na bierazie Minskaha mora (Zasłaŭskaha vadaschovišča), adkryty dla naviednikaŭ z 2011 hoda. Naprykład, tut zvyčajna spyniajecca futbolnaja zbornaja Biełarusi.
Prakat jacht, kataraŭ i navat viertalotaŭ — taki nabor zabavak znojdziecca mała dzie ŭ Biełarusi. A jašče ŭ «Robinsan Kłabie» jość svaja kancertnaja placoŭka.
«Robinsan Kłab» — adzin z samych darahich kłubaŭ krainy
Tapuzidzis aranduje ziamlu, kala 10 hiektaraŭ, na tradycyjnyja 99 hadoŭ. I płacić niamała — bolš za $18 tysiač u hod, pryčym u valucie.
Harnałyžny kurort Čyža
Harnałyžny kompleks «Łahojsk», jaki naležyć samamu bahatamu biełaruskamu biznesmienu Juryju Čyžu, adkryŭsia dziesiać hadoŭ tamu. «Łukašenka kataŭsia na łyžach u rasijskaj Krasnaj Palanie i litaralna zahareŭsia idejaj stvareńnia takoha centra ŭ nas. Skazaŭ mnie: «Jura, tam mnie aŭstryjcy ŭvieś čas mazhi durać nakont budaŭnictva ŭ Łahojsku hary, źjeździŭ by ty, pahladzieŭ na tyja miescy i prykinuŭ, što tam možna zrabić». Ja prykinuŭ ich mocnyja i słabyja baki, kab čužych pamyłak nie paŭtarać, a kali saśpieŭ kančatkova, skazaŭ prezidentu, što «Trajpł» za heta voźmiecca. Prezidentu maje dovady zdalisia pierakanaŭčymi, i jon daŭ dabro», — raskazvaŭ Čyž historyju stvareńnia «Łahojska». U skład kompleksu ŭvachodziać hatel i restaran.
Cikava, što za ziamlu Čyž nie płacić. Rasparadžeńniem Alaksandra Łukašenki biznesmien atrymaŭ 50 hiektaraŭ u pastajannaje karystańnie.
Pražyvańnie ŭ vip-katedžy ŭ «Łahojsku» kaštuje $260 ŭ dzień
Inšaje rašeńnie kiraŭnika dziaržavy datyčyłasia budoŭli na małoj radzimie miljaniera, kala vioski Sabali Biarozaŭskaha rajona.
Pavodle ŭkaza, «turystyčny kulturna-etnahrafičny kompleks «Naš rodny kut Sabali» mieŭsia być dabudavanym u 2015 hodzie. Pad budoŭlu Čyžu vydzialałasia 333,4 hiektara ziamli.
Adnak zamoŭlenym tempam pracy miljanier pakul što nie daje rady. Stvoranaja im kampanija «Busłoŭka» arandavała ŭsiaho kala 10 hiektaraŭ (štohadovaja płata — kala 22 miljonaŭ rubloŭ). U poli vidać tolki zapraŭku dy niekalki chatak.
Palavańnie Šakucina
Čym moža pachvalicca Alaksandr Šakucin, dyk heta samym statusnym kiraŭnikom svajho turystyčnaha biznesu. Sioleta kampaniju «Šanter» (rasšyfroŭvajecca jak «Šykoŭny Adpačynak Na TErytoryi Radzimy») uznačaliła Natalla Piatkievič, byłaja pamočnica Alaksandra Łukašenki.
Interjery «Krasnaha boru»
Kampanija abjadnała niekalki turystyčnych abjektaŭ, raskidanych pa ŭsioj krainie. Šakucinu i jahonym biznes-partnioram naležać baza adpačynku «Rudakova» na Naračy (darečy, pobač z rezidencyjaj Tapuzidzisa), sanatoryj «Praleska» pad Minskam i dziciačy łahier «Damanava» ŭ Maładziečanskim rajonie. Hetyja abjekty znachodziacca na bałansie «Amkadora» ŭžo daŭno.
A voś apošnim časam Šakucin i jaho navapołacki kampańjon Mikałaj Varabiej śpiecyjalizujucca na palavańni i rybałcy. Jany ŭ roŭnych dolach vałodajuć kampanijaj «Interservis», jakaja aranduje 58,6 tysiačy hiektara terytoryi zakaźnika «Krasny Bor» ŭ Vierchniadźvinskim i Rasonskim rajonach.
Łasi, dziki, kazuli — lik žyviołaŭ idzie na sotni. Ahučvalisia navat płany razvodzić zubroŭ. Znachodžańnie ŭ hetym rai dla palaŭničaha kaštuje doraha. Ceny ŭ miascovym hateli pačynajucca ad $200 za noč.
«Krasny bor» znachodzicca na samaj poŭnačy Biełarusi
Asobnaja krynica dachodaŭ — płatnaja rybałka. Dla hetych metaŭ «Interservis» arandavaŭ šeść azioraŭ niepadaloku ad miažy z Rasijaj.
