Z 13 pa 15 lipienia ŭ Minsku prachodziła kanfierencyja Mobile Optimized, najvialikšaja IT-kanfierencyja takoha kštałtu va Uschodniaj Jeŭropie. Uviečary apošniaha dnia maładyja raspracoŭščyki pradstavili na adkrytaj vystavie svaje hulni.
Usie zvykli, što biełarusy robiać «tančyki» — u hulni kampanii Wargaming hulaje sotnia miljonaŭ čałaviek pa ŭsim śviecie. Niadaŭna ŭ prodažy źjaviŭsia inšy vialiki prajekt biełarusaŭ, «Lehiendy Ajzienvalda». Ale mnostva biełaruskich prahramistaŭ i dyzajnieraŭ robiać nievialičkija prajekty — kamandy pa paru čałaviek stvarajuć paŭnavartasnyja hulni, niekatoryja ź jakich majuć surjoznyja šancy na łakalny, a to i suśvietny pośpiech.
Niekatoryja prajekty ŭžo vyjšli, niekatoryja vyjduć u chutkim časie. Usie hulni biaspłatnyja — siońnia ŭ nievialikich prajektach pryniata zarablać na pakupkach u samich hulniach albo prosta na rekłamie.
Crash of Bones
Trochmiernaja «mulciašnaja» hulnia nahadvaje arkanojd — treba adbivać hierojem-płatformaj šaryk, kab raźbić błoki. Ale ŭ hetaj hulni jość siužet — u rycara skrali pryncesu, jamu treba sabrać hrošy-zorački na vykup. U asnoŭnym hulniu zrabiŭ adzin čałaviek, ale nie biez dapamohi svajoj kamandy i fryłansieraŭ. Pakul jana jość tolki dla Android (u Play Store jaje vypuścili tolki ŭ dzień kanfierencyi), ale aŭtar płanuje vypuścić i dla inšych płatform, u tym liku dla «razumnych televizaraŭ». Što cikava, u hulni jość i biełaruskamoŭny interfiejs.
Sea Dogs
Mnohija «dzieci 90-ch» hulali ŭ «Karsaraŭ», ale marskaja tema z tych časoŭ redka ŭzdymałasia ŭ hulniach — siońniašniaja moładź płavaje ŭ śviežych World of Warships. Marskuju temu ažyŭlajuć try minčanina z Indigo Bunting — u ich śviecie ŭ marskich batalijach sustrakajucca vikinhi, indejcy i piracki aljans. Niadoŭhija batalii pa 5-10 chvilin adbyvajucca miž realnymi hulcami ŭ sacsietkach (hulcoŭ prychodzić bolš za tysiaču čałaviek na dzień), karabli možna palapšać, pierafarboŭvać, adkryvać novyja. Vypuskać hulniu na mabilnyja aŭtary pakul nie źbirajucca — zašmat treba hrošaj na raskrutku, a «UKantakcie» kankurencyja pakul nie takaja vialikaja, hulcy znachodziać hulniu sami. Praz peŭny čas hulnia źjavicca na Facebook i ŭ «Adnakłaśnikach».
Fantastic Pie
Studyja Digital Gravitation pachvaliłasia hulnioj, padobnaj da Fruit Ninja: pa ekranie lotajuć pradukty charčavańnia, ich treba «narazać» palcami. Ale ŭ ich Fantastic Pije, zroblenaj siłami čatyroch čałaviek, treba nie prosta rezać frukty — treba zhatavać piroh. Niekatoryja frukty treba razrazać na čatyry častki, niekatoryja čyścić. Što važna, svaimi pirahami hulcy mohuć dzialicca ŭ sacsietkach, vinšavać takimi «virtualnymi paštoŭkami» siabroŭ. Hulnia raźličanaja chutčej na žančyn 25-40 hod, jakija lubiać prostyja kazualnyja hulni, ale chočuć niešta krychu bolš składanaje. Fantastic Pie pakul nie vyjšła, hatovaja prykładna na 80%. Raspracoŭščyki chočuć vyjści na suśvietny rynak i ŭ pryvatnaści na ZŠA, ale šukajuć dla hetaha inviestaraŭ — na adnych pastach karystalnikaŭ u sacsietkach raskrucicca ciažka.
I Hate Bears
«U čym sutnaść: jość maleńkaje biełaje puchnataje zajčania, nichto nie lubić maleńkich puchnatych zajčaniatak, a jość plušavyja miadźviedziki, jakich ludzi lubiać bolš, — žvava raspaviadaje raspracoŭščyk, jaki zrabiŭ jaje z dvuma siabrami za paru dzion. — Zajčaniu nadakučyła, što ŭsie lubiać miadźviedzikaŭ, jon dastaŭ nož i pajšoŭ ich rezać. A my musim vyratavać miadźviedzikaŭ». Aŭtar kaža, što hulnia choć i kirujecca adnym palcam, ale budzie davoli składanaj, na ŭzroŭni Flappy Bird. Pakul aŭtar nie vyrašyŭ, jak kankretna zarabić na takoj idei — źbirajecca ŭstavić nievialičkuju rekłamu, što nie budzie zaminać hulać. «Zachaciełasia — prosta zrabili. Bo možam, napeŭna», — kaža aŭtar pra jaje stvareńnie. I Hate Bears vyjdzie prykładna praz tydzień dla Android, potym iOS i navat u Amazon Store, moža źjavicca i dla kampjutara.
Maze Explorers
Prajekt dvuch chłopcaŭ Dark Times pakul daloki ad zaviaršeńnia — płanujecca anłajn-hulnia na šmat karystalnikaŭ, dy pakul pahulać možna tolki adnomu. «Ciomna, ničoha nie bačna, strašna… Viesieła!» — kaža aŭtar i nazyvaje Maze Explorers «Battlefield'am ź miačom i mahijaj u ciomnym łabiryncie». Kali kamanda znojdzie inviestaraŭ, jana hatovaja darabić prajekt za hod i vypuścić jaho na Steam, namiery surjoznyja.
Time of Dragons
Padpisacca na Steam Greenlight
Kamanda 4 I Lab šukaje ź inviestaraŭ ź inšaj nahody: ich hulnia ŭžo razrasłasia da takich maštabaŭ, jany bajacca, što jaho «sami nie paciahnuć». Viersija dla sacsietak užo hatovaja, a voś na raspracoŭku i markietynh Steam-viersii sił šaści čałaviek moža nie chapić. Ich «Čas drakonaŭ» nahadvaje adnačasova MMORPG, rolevuju hulniu kštałtu DoTA i stralałku-duel. Hulec-«lotčyk» kiruje drakonam, kožny drakon maje ŭnikalnyja asablivaści i svaju rolu ŭ kamandzie. Najbolš aŭdytoryi hulnia maje «UKantakcie» (tam hulajuć da 2,5 tysiač čałaviek na dzień), taksama ŭ jaje hulajuć na «Adnakłaśnikach» (tam, jak ni dziva, płociać bolš — adnojčy čałaviek nakupiŭ aphrejdaŭ na amal 50 dalaraŭ) i Facebook (niamała hulajuć u Tajłandzie, Indyi, Turcyi, Čyli, Brazilii…). Z vypuskam na mabilnyja pryłady pakul jość ciažkaści, pryładzić kiravańnie drakonam ciažka. Ale raspracoŭščyki marać adaptavać paloty na drakonach navat da akularaŭ virtualnaj realnaści.
Lohkaja, ciažkaja i niemahčymaja hulni studyi Empty Stage
Pasprabavać dema hulniaŭ na sajcie studyi
Kamanda Empty Stage pakazała amal try hulni: lohkuju, ciažkuju i niemahčyma ciažkuju. Zrazumieć, jak hulać u Maybe Flat, moža, napeŭna, tolki jaje aŭtar: treba vykinuć na kubiku ličby ad 1 da 6, dy kubik isnuje ŭ niejkaj 4D-prastory, składvajecca ŭ liniju ci punkt. Zabava choć i «adnarazovaja», ale «mozhavynosnaja», zarabić na joj šmat hrošaj nie vyjdzie, ale prosta vypuścić takoje — cikava. U bolš prostaj Charming Chammies, što troški nahadvaje Lines, frukty treba nie prosta pierasoŭvać palcami, a chapać jazykami chamieleonaŭ, pravodziačy pa łabiryncie. Z prachodžańniem uzroŭni stanoviacca ciažejšymi, źjaŭlajecca bolš typaŭ fruktaŭ, ciažejšyja łabirynty i bolš chamieleonaŭ. U samaj lohkaj hulni kot sprabuje dahnać ptušku, kinuŭšysia za joj z vysokaha paviercha doma. Hulcu treba dapamahčy katu ŭviarnucca ad pieraškodaŭ i pa darozie sabrać pierje. «Jon nie pamiraje, jon spuskajecca na parašucie — vielmi humannaja hulnia!» — śmiajecca aŭtar. Choć šeść čałaviek u studyi robiać hulni ŭ volny ad asnoŭnaj pracy čas, na svaich prajektach jany płanujuć zarablać: u tym ža «kociku» možna pry žadańni dadać pakupku kaściumaŭ dla kata i inšyja bonusy. Hulni pakul nie vypuščanyja, ale «kubik» užo hatovy — zastałosia tolki apisać, jak u jaho hulać.
Biełaruska-litvinskija šachmaty
Pačytać pra hulniu na sajcie raspracoŭščyka
Zavitała na vystavu i studyja Pras.by, jakaja pakazała… šachmaty. Praŭda, pa niezvyčajnych praviłach. Adnojčy ŭ 1999 hodzie prafiesar Haradzienskaha ŭniviersiteta Aleś Astroŭski pryśniŭ piramidu 9ch9, z adnoha boku jakoj stajali čmiali i pčoły, a ź inšaha — vosy i šeršni. Jany jak u šachmatach (tolki ź lišniaj «fihuraj») zmahalisia za toje, kab uźniacca na viaršyniu piramidy. Praź niekalki hod studyja Pras vyrašyła zrabić z hetaha madyfikacyju šachmat, dapracavać praviły i vypuścić paŭnavartasnuju nastolnuju hulniu. U dadatak da nastolnaj raspracoŭvajecca i jaje kampjutarnaja viersija. Ale asnoŭny napramak — fizičnyja šachmaty, što buduć pradavacca ŭ tannym varyjancie (lnianaja doška, fihury z epaksidnaj smały, cana kala paŭmiljona) i darahoj kalekcyjnaj viersii (dubovyja doški i fihurki ručnoj raboty pa canie ad 500 dalaraŭ). Elektronnaja ž viersija chutčej dla aznajamleńnia i padrychtoŭki da turniru, što maje prajści ŭvosień razam z prezientacyjaj hulni.
Changing The World
Kvadratnaha Boba i kruhłuju Alisu razłučyli, a kab zakachanyja znoŭ sustrelisia, hulcu litaralna pryjdziecca źmianić śviet: pierasoŭvać płatformy i błoki, kab pravieści hieroja praz uzrovień z ulikam zakonaŭ fiziki. Try čałavieki — prahramist ź Minska, mastačka z Kijeva i kampazitar z Mančestara ŭžo vydali (i navat pieravydali) hulniu dla Android. Jany ŭžo robiać novuju hulniu — hatovy pratatyp, ale kamanda šukaje Unity-prahramista. Jamu abiacajuć dobruju zarpłatu: prajekt kamiercyjny, na hulniach kamanda płanuje surjozna zarablać.
Tanky Toys
Aŭtar «cacačnych tančykaŭ» pakul nie dumaŭ, jak zarablać na svaim prajekcie — heta svajeasablivy ekśpierymient, kab «ulicca ŭ hiejmdev». U hulni z davoli prostaj hraficy možna «pastralać» ci adnamu, ci ź siabram pa Bluetooth (hulali ŭžo 50 tysiač čałaviek). Aŭtar pracuje nad hulnioj sam u volny čas, ale šukaje dyzajniera, kab palepšyć hrafiku.
Cube Day Z
Minecraft, Quake, GTA, DayZ — hulnia kamandy idspe, nad jakoj pracavali dva-try čałavieki, nahadvaje mnoha jakija prajekty. Aŭtary pryznajuć — jana nahadvaje Unturned, ale maje i svaje asablivaści. U śviecie z «kvadratnaj» hrafikaj hulcam pryjdziecca budavać bazy-schoviščy, kab vyžyć u bojkach z praciŭnikami i zombi. U hulni ŭžo jość 250 pradmietaŭ i pad dźvie sotni receptaŭ dla stvareńnia novych. U chutkim časie źjaviacca i mašyny — budzie navat stvoranaja kopija miastečka Sendzi Šors z GTA V. Taksama płanujecca i režym dueli «Hałodnyja hulni». Hulnia biaspłatnaja, a kab zarabić na joj, aŭtary dadali pakupki, što nie ŭpłyvajuć naŭprost na praces (naprykład, płatnym zrabili čat). Prajekt pakul jość «UKantakcie», pad vosień vyjduć viersii dla inšych sacsietak i smartfonaŭ (dla iOS jana moža stać płatnaj). Heta nie pieršy prajekt studyi — u ich stralałku «Hołas Prypiaci» zhulali «UKantakcie» amal dva z pałovaj miljona čałaviek.
***
Viadoma, heta daloka nie ŭsie hulni, što robiać biełarusy. Niekatoryja prychodzili prosta pahladzieć i pasłuchać. Niekatoryja ž pakazvali svaje hulni na vystavie, ale prasili pra ich nie raspaviadać — maŭlaŭ, jašče nie hatovyja, nadta rannija viersii.
Jak ličycie, ci jość siarod vyšej nazvanych budučyja zorki biełaruskaha IT?
