Kolkaść achvotnych uziać udzieł u vybarach — 14 čałaviek (h.zn. padali dakumienty na rehistracyju inicyjatyŭnych hrup): Alaksandr Łukašenka, Siarhiej Kalakin, Siarhiej Hajdukievič, Andrej Kanaviec, Taćciana Karatkievič, Anatol Labiedźka, hrupa Mikałaja Statkieviča, Žanna Ramanoŭskaja, Iryna Pieršyna, Siarhiej Zabłocki, Tamara Birukova, Viktar Ciareščanka, Alaksandr Judajeŭ, Mikałaj Ułachovič. CVK zarehistravaŭ pakul hrupy Łukašenki, Kalakina i Hajdukieviča. Nastupnaje pasiadžeńnie CVK — u paniadziełak.
18:48
Za niekalki chvilin da dedłajna źjaviŭsia 14-y kandydat. Heta Mikałaj Ułachovič — staršynia Biełaruskaj patryjatyčnaj partyi, viarchoŭny ataman «Biełaruskaha kazactva». U jaho hrupie bolš za 1000 čałaviek. Kiraŭnik inicyjatyŭnaj hrupy — Michaił Obrazaŭ.
Jon kaža, što nie vystupaje suprać Łukašenki, što jon i Łukašenka — patryjoty.
Mikałaj Ułachovič, fota Siarhieja Hudzilina
Ułachovič, darečy, byŭ hierojem publikacyi ŭ «Našaj Nivie», dzie raspaviadałasia pra biełaruskaje kazactva
Tym časam kančatkova stała viadoma, što pradprymalnik Uładzisłaŭ Citovič admoviŭsia ad udziełu u vybarach.
18:20
Čarhovaja intryha viečara ščaśliva vyrašyłasia. Patencyjny kandydat z Navapołacka Alaksandr Judajeŭ paśpieć padać dakumienty. Kiraŭnik inicyjatyŭnaj hrupy — Taćciana Buraja.
Alaksandr Judajeŭ, fota Siarhieja Hudzilina
I sam Judajeŭ, i pradstaŭniki jaho inicyjatyŭnaj hrupy vyhladajuć na pradstaŭnikoŭ modnaj apošnim časam płyni łambierseksuałaŭ.
Jon na minułych vybarach hałasavaŭ za Niaklajeva, a ciapier ličyć, što niama dastojnaha, za kaho addać hołas, tamu vyłučajecca sam.
Na jaho dumku, frykam ciapier možna ličyć kožnaha.
Judajeŭ skončyŭ Akademiju mastactvaŭ, raniej jon pracavaŭ fotakarespandentam u haziecie «Vieśnik Naftana», a ciapier uładkavaŭsia ŭ navapołacki Pałac kultury. Ni da jakich palityčnych ruchaŭ nie naležyć. Kaža, što adnosiny z Rasijaj pavinny zastavacca ŭ pryjarytecie. Aburajecca «naviazvańniem jeŭrapiejskich kaštoŭnaściaŭ».
17:17
Dakumienty padaŭ pradprymalnik Viktar Ciareščanka, udzielnik kampanii-2010.
U jaho inicyjatyŭnaj hrupie 1000 čałaviek. Kiraŭnik hrupy — Aleh Nieściarkoŭ.
Jon skazaŭ, što jaho meta — stabilizacyja valuty i ekanomiki. «Kali b mianie pasłuchalisia ŭ 2010 h., to my b žyli dobra i nie adbyłasia devalvacyja, pra što ja niaraz papiaredžvaŭ».
Jon taksama zajaviŭ, što Płošča ŭ 2010 h. była pravakacyjaj.
Ciareščanka padkreślivaje, što jon nijaki nie sparynh-partnior Łukašenki, bo nie moža ŭžo znajści sabie 5 hadoŭ pracu.
Jon zajaŭlaje, što adnosiny z Rasijaj nie pavinny być pryjarytetnymi, a treba adnolkava siabravać ź inšymi krainami, u tym liku ź Jeŭropaj.
Ciareščanka dadaŭ, što razhaniać ciapierašni urad nie varta, a prosta treba navučyć pracavać.
Viktar Ciareščanka, fota Siarhieja Hudzilina
17:05
Žurnalist Vasil Siamaška prynios u CVK rehistravać kata. Toj vyryvajecca i nie choča iści ŭ Centrvybarkam.
Kata ŭ CVK u vyniku nie prapuścili, skazali, što kot nie moža być zarehistravany. Ale, jak kažuć u kułuarach achoŭniki, kot vyhladaje lepiej, čym inšyja kandydaty.
16:44
Dakumienty u CVK padała Tamara Birukova. U jaje hrupie 55 čałaviek.
fota Siarhieja Hudzilina
Joj 48 hadoŭ, pavodle adukacyi matematyk, pracavała nastaŭnicaj małodšych kłasaŭ. Ciapier, pa jaje słovach vučycca na jurysta.
Na pytańnie, čyj Krym, adkazała: «Ahulny — i rasijski, i ŭkrainski».
U jaje čaćviora dziaciej, jana — prychilnica Statkieviča, kaža, što heta ŭzor mužnaści. Jana chacieła b pryjechać da baćkoŭ Statkieviča i stać pierad im na kaleni.
16:30
Štab Pieršynoj: Krym — heta Ukraina
15:40
Juryja Šulhana i kiraŭnika jaho štaba Paŭluka Kanavalčyka zabrała milicyja i pasadziła va ŭazik, kab vieźci u RUUS dla testu na ałkahol.
15:15
Pad viečar płanuje pryjechać jašče adzin kandydat z Navapołacka. Pakul jon u darozie.
15:10
Kala CVK znachodzicca patencyjny kandydat Uładzisłaŭ Citovič. Jon padrychtavaŭ patrebnyja dakumienty, ale vahajecca, ci padavać ich.
15:05
Stała viadoma, što admoviŭsia ad udziełu ŭ vybarach pradprymalnik, arhanizatar miadovych kirmašoŭ Juryj Radźkoŭ
15:00
Patencyjny kandydat u prezidenty Juryj Šulhan pakul nie moža padać dakumienty ŭ CVK, bo milicyja jaho nie puskaje ŭ budynak Doma ŭrada. Pryčyna — zanadta mocny pach ałkaholu ad kandydata.
Juryj Šulhan, fota Siarhieja Hudzilina
* * *
Da 19.00 17 lipienia ŭsie achvotnyja bałatavacca ŭ prezidenty Biełarusi abaviazanyja prynieści svaje zajaŭki ŭ Centrvybarkam. Kožny achvotny biełarus moža prynieści svaju zajaŭku na rehistracyju inicyjatyŭnaj hrupy. Dla taho, kab jaje zarehistravali, u śpisie musić być nie mienš za 100 čałaviek. Adnak zajavy prymajuć ad usich. Tych, chto nie adpaviadaje patrabavańniam zakona, adsiejać 22 lipienia.
Na dadzieny momant padadzienyja ŭžo 10 zajavak ab rehistracyi inicyjatyŭnych hrup: Alaksandra Łukašenki, Siarhieja Kalakina, Siarhieja Hajdukieviča, Andreja Kanaŭca, Taćciany Karatkievič, Anatola Labiedźki, ad imia palitviaźnia Mikałaja Statkieviča, Iryny Pieršynaj, Žanny Ramanoŭskaj i Siarhieja Zabłockaha (jon dasłaŭ dakumienty pa pošcie, tamu abaviazany paćvierdzić ich asabistaj prysutnaściu).
Pieršyja try ź ich — Łukašenka, Kalakin i Hajdukievič — užo zarehistravanyja.
22 lipienia stanie viadoma, ci buduć zarehistravanyja tyja ci inšyja inicyjatyŭnyja hrupy. Potym startuje zbor podpisaŭ. Kab prajści dalej, treba nabrać 100 tys. podpisaŭ.
Vybary pryznačanyja na 11 kastryčnika.
