Kiraŭniki vyšejšych i siarednich śpiecyjalnych navučalnych ustanoŭ niasuć piersanalnuju adkaznaść za nieabhruntavanaje pavyšeńnie koštu navučańnia, havorycca ŭ kamientaryi pres-centra Ministerstva adukacyi Biełarusi, apublikavanym na sajcie viedamstva.
Jak paviedamlałasia raniej, ceny na navučańnie ŭ 2015/2016 navučalnym hodzie biełaruskija VNU pavysili ŭ siarednim na 10—15%. Naprykład hod vučoby na pieršym kursie dzionnaha adździaleńnia hałoŭnaj VNU krainy — Biełdziaržuniviersiteta — budzie kaštavać ad 19,48 młn. da 24,68 młn. rubloŭ (letaś maksimalny košt navučańnia składaŭ 21,52 młn.).
Pres-centr Minadukacyi adznačaje, što «ceny na navučańnie na płatnaj asnovie ŭ dziaržaŭnych ustanovach adukacyi vyznačajucca zychodziačy ź nieabchodnych zatrat na padrychtoŭku śpiecyjalista pa kankretnaj śpiecyjalnaści».
Viedamstva padkreślivaje, što «ŭ dziaržaŭnych ustanovach vyšejšaj i siaredniaj śpiecyjalnaj adukacyi košt navučańnia na płatnaj asnovie, ustanoŭleny z 1 vieraśnia 2014 hoda, zastavaŭsia niaźmiennym na praciahu 2014/2015 navučalnaha hoda», niahledziačy na pavyšeńnie ŭ hety pieryjad zarpłat rabotnikaŭ biudžetnych arhanizacyj, a taksama rostu taryfaŭ na kamunalnyja pasłuhi, pasłuhi suviazi.
Minadukacyi nahadvaje, što «ŭ adpaviednaści z zakanadaŭstvam VNU i SSNU ŭstanaŭlivajuć z 1 vieraśnia 2015 hoda košt navučańnia dla navučencaŭ I kursu z ulikam najaŭnaha pamieru taryfnaj staŭki pieršaha razradu, ustanoŭlenaj dla rabotnikaŭ biudžetnych arhanizacyj, uzroŭniu cen i taryfaŭ na kamunalnyja pasłuhi i pasłuhi suviazi pa stanie na 1 lipienia 2015 hoda».
«Košt navučańnia pa raniej zaklučanych dahavorach na navučańnie (dla navučencaŭ II—V kursaŭ) z 1 vieraśnia nie źmianiajecca», — zapeŭnili ŭ Minadukacyi.
Adznačajecca taksama, što «na padstavie zajaŭ hramadzian, uličvajučy sacyjalnuju značnaść padrychtoŭki śpiecyjalista na płatnaj asnovie, kiraŭniki dziaržaŭnych ustanoŭ adukacyi mohuć źbirać płatu za navučańnie z adterminoŭkaj abo rasterminoŭkaj płaciažu».
«Źviartajem uvahu, što kiraŭniki ŭstanoŭ adukacyi niasuć piersanalnuju adkaznaść za nieabhruntavanaje pavyšeńnie koštu navučańnia», — padkreślivajecca ŭ kamientaryi.
