Ad imia Mikałaja Statkieviča arhkamitet inicyjatyŭnaj hrupy pa vyłučeńni hetaha palitviaźnia kandydatam u prezidenty Biełarusi padziakavaŭ kožnamu z 1700 čałaviek, chto znajšoŭ u sabie mužnaść dałučycca da kampanii «Biez vyzvaleńnia kandydata ŭ prezidenty na minułych vybarach Mikałaja Statkieviča i ŭsich biełaruskich palitviaźniaŭ i poŭnaha adnaŭleńnia ich u pravach nijakija vybary ŭ Biełarusi nie mohuć ličycca svabodnymi i spraviadlivymi».
«Va ŭmovach aŭtarytarnaha režymu vy takim čynam prademanstravali salidarnaść ź Mikałajem Statkievičam, Iharam Alinievičam, Mikałajem Dziadkom, Jaŭhienam Vaśkovičam, Arciomam Prakapienkam i Juryjem Rubcovym, pravaabaroncami Andrejem Bandarenka i Michaiłam Žamčužnym, — havorycca ŭ zvarocie. — Vaš učynak maje samyja stanoŭčyja nastupstvy dla budučyni biełaruskaha naroda, jaki atrymaŭ urok i prykład mužnaści, hramadzianskaj adkaznaści i salidarnaści z baraćbitami za svabodu ŭ Biełarusi».
«Asablivuju moc našym supolnym dziejańniam nadaje toje, što ŭ inicyjatyŭnuju hrupu ŭvajšli dziasiatki pradstaŭnikoŭ biełaruskaj tvorčaj i navukovaj elity. Hetaja kansalidacyja, a taksama padtrymka Mikałaja Statkieviča šyrokaj kaalicyjaj palityčnych partyj i hramadskich ruchaŭ natchniaje nas na dalejšuju baraćbu», — havorycca ŭ zvarocie.
Admovu ŭ rehistracyi inicyjatyŭnaj hrupy ŭ zvarocie nazyvajuć niezakonnaj. Centrvybarkam Jarmošynaj u zvarocie nazyvajuć «viasiołym bałahančykam».
«Heta čarhovaja sproba dać pieravahu hałoŭnamu kłoŭnu vybarčaha farsu», — pišuć u zvarocie.
Inicyjatyŭnaja hrupa źvierniecca ŭ Viarchoŭny sud sa skarhaj na niezakonnyja dziejańni čynoŭnikaŭ z CVK, ale hatovaja da admoŭnaha rašeńnia, bo «niezaležnych [sudovych] struktur ŭ našaj krainie niama».
Inicyjatary abiacajuć praciahvajuć dziejnaść da poŭnaha vyzvaleńnia palitviaźniaŭ i zaklikajuć dałučacca praz sajt
- statkevich.org ci dasłaŭšy list na
[email protected], ci [email protected], ci [email protected].
