Kancepty bazy na Miesiacy i schovišča paliva na arbicie. Vyjavy: Anna Nesterova, «Evolvable Lunar Architecture»
Na 46-ju hadavinu vysadki ekipažu «Apałona-11» na Miesiac hrupa daśledčykaŭ i inžynieraŭ kampanii NexGen Space prapanavała prajekt «Evolvable Lunar Architecture», pavodle jakoha naha čałavieka znoŭ zmoža stupić na spadarožnik Ziamli ŭžo ŭ bližejšyja hady, pieradaje The Verge.
Pavodle prajektu, u 2017 hodzie možna zapuścić bieśpiłotnyja aparaty, jakija padrychtujuć bazu dla prybyćcia ludziej u 2022 hodzie.
Daśledčyki prapanujuć vykarystoŭvać dla palotaŭ na Miesiac rakiety pryvatnaj kampanii SpaceX, u pryvatnaści ich nastupnaje pakaleńnie Falcon Heavy. Dastaŭka hruzaŭ ciapierašnim pakaleńniem rakiet hruzaŭ na MKS kaštuje kala 4750 dalaraŭ za kiłahram, tady jak kiłahram hruzu na rakiecie «Saturn V», što vyvieła na arbitu «Apałon-11», kaštavaŭ 46 tysiač dalaraŭ. Falcon Heavy maje dastaŭlać hruzy pa takoj ža ci navat nižejšaj canie.
Inšy punkt płanu — zdabyča rakietnaha paliva prosta na Miesiacy. Vadarod dla jaho vytvorčaści možna zdabyvać z palarnych ldoŭ, pierapracoŭvać prosta na Miesiacy i zachoŭvać na arbicie spadarožnika. Paliva zatym možna pradavać NASA inšym kampanijam, u tym liku vykarystoŭvać dla palotu na Mars (a značyć, zrabić tańniejšym i jaho).
Pavodle płanu, u 2017 hodzie ŭžo možna zapuskać miesiacachody. U 2018 hodzie jany pačnuć šukać vadarod, u 2021-m — stanuć budavać bazu dla ludziej. Čałaviek maje źjavicca na hetych bazach u 2022 hodzie. Na ŭsiu prahramu prapanujecca vydatkavać 10 młrd dalaraŭ, pa 5 młrd dla dźviuch kamand, što buduć dziejničać paralelna.
Daśledčyki nie prapanujuć vydatkoŭvać novyja srodki, a prosta pieraraźmierkavać ich. NASA užo płanuje palot na Miesiac na rakiecie «Space Launch System», ale ŭ płany nie ŭvachodzić pasadka. Aŭtary raboty spadziajucca, što ich prajekt budzie padtrymany ŭ 2016 hodzie nastupnym prezidentam ZŠA.
