Miesca zdareńnia na mapie Minabarony Ukrainy (frahmient)
Ukrainski vajskoviec z punktu propusku «Krasnaja Tałaŭka» ŭ niadzielu, 26 lipienia adkryŭ ahoń pa hramadzianach Rasii, jakija vyrašyli sfatahrafavacca na fonie KPP, adzin mužčyna trapiŭ u lakarniu z ranieńniem hrudnoj kletki, paviedamlaje rasijskaje RIA Novosti. Zdymki turystaŭ nie publikujucca.
Ukrainskaja pamiežnaja słužba zajaŭlaje, što infarmacyja nosić pravakacyjny charaktar. TSN udakładniaje: u krasaviku Dziaržpahransłužba Ukrainy zajaŭlała, što punkt propusku časova zakryty, ciapier jon nie značycca ŭ śpisie prapusknych punktaŭ.
Adnaznačna vyśvietlić, ci jość infarmacyja pra «abstreł za sełfi» pravakacyjaj, niemahčyma. Ale padobna, što ŭkrainski punkt propusku dziejničaje. Dy sa zhadanym u rasijskich ŚMI miescam adpačynku błytanina.
Na aficyjnaj mapie situacyi ŭ zonie ATO na 25 lipienia punkt propusku «Krasnaja Tałaŭka» paznačany jak dziejny. Jak pakazaŭ pošuk pa fotazdymkach u sacsietkach (takim mietadam žurnalisty vykryvajuć prysutnaść rasijskich vajskoŭcaŭ na Danbasie), prynamsi na pačatku červienia pad «Krasnaj Tałaŭkaj» znachodziłasia mašyna z nadpisam «Prikordonna słužba». Kali punkt i nie dziejny, uzbrojenyja pamiežniki tam prysutničali paśla paviedamleńnia ab zakryćci.
RIA Novosti sa spasyłkaj na pradstaŭnika pamiežnaha ŭpraŭleńnia FSB Rasii pa Rastoŭskaj vobłaści paviedamlaje, što rasiejcy adpačyvali na štučnym vadajomie ŭ rajonie chutara Navaruski na rasijskaj terytoryi. Ad raki la chutara da pamiežnaha pierachodu bolš za 4 kiłamietry pa pramoj, a niešta, padobnaje da štučnaha vadajoma, znachodzicca tolki pad samym pierachodam, daloka ad zhadanaha chutara. Na schiemie «Jandeks.Kart» pad Navaruskim paznačany štučny vadajom, ale na spadarožnikavych zdymkach Google 2015 hoda bačna, što štučnaha vadajoma tam (užo?) niama.
Zhadany rasijskim bokam chutar Navaruski (paznačany źleva) i najbližejšy kandydat u štučnyja vadajomy (paznačany sprava)
Pošuk pa sacsietkach taksama pakazaŭ, što ludzi adpačyvajuć na vadajomie na poŭdni ad pierachodu, nad samym chutaram Krasnaja Tałaŭka na ŭkrainskaj terytoryi (pa pramoj 3 km na poŭdzień ad pierachodu), ale nie pakazaŭ fota adpačyvaŭšych u hetym rajonie na terytoryi Rasii (što nie značyć, što nichto tam nie adpačyvaŭ — ludzi mahli nie rabić fota ci adklučyć paznačeńnie miescaznachodžańnia).
Rasijski bok śćviardžaje, što ŭkrainski vajskoviec kryknuŭ rasiejcam «stoj!», zatym adkryŭ pa ich ahoń. Ukrainski bok śćviardžaje, što pamiežnikam zabaroniena adkryvać ahoń u bok susiedniaj krainy, a apieratyŭnaja pravierka pakazała, što zbroja ŭsich pamiežnych atradaŭ nie maje śladoŭ užyvańnia i ŭsie bajeprypasy ŭ najaŭnaści.
Tym časam ukrainskija pamiežniki nie kažuć pra zhadanaje TSN zakryćcio prapusknoha punktu. Ale ŭkrainski bok zhadvaje, što 25 lipienia na Danieččynie byŭ zatrymany hruzavik z bajeprypasami, jaki supravadžaŭ pradstaŭnik niezakonnaha farmavańnia i major uzbrojenych sił RF. «Mahčyma, nievierahodnaja infarmacyja ab abstrele była raspaŭsiudžanaja z metaj adciahnieńnia ŭvahi hramadskaści ad udziełu ŭzbrojenych sił RF u kanflikcie na Uschodzie našaj krainy», — vykazvajuć dumku ŭkrainskija pamiežniki.
