 Aleś Maračkin |
Biełaruski PEN‑centar atrymaŭ adkaz ź Ministerstva infarmacyi adnosna vydańnia knihi «Mikoła Sielaščuk. Hučańnie muzyki niabiosaŭ».
U adkazie za podpisam namieśnika ministra infarmacyi Ihara Łapcionka nahadvajecca, što zhodna z art. 4 Zakonu «Ab druku i inšych srodkach masavaj infarmacyi» pad cenzuraj masavaj infarmacyi razumiejecca patrabavańnie ad redakcyi z boku dziaržaŭnych ustanoŭ, hramadzkich abjadnańniaŭ, ich słužbovych asobaŭ papiarednie ŭzhadniać materyjały, a taksama patrabavańnie źniać z druku toj ci inšy materyjał.
Pavodle atrymanaj ad vydaviectva «Mastackaja litaratura» infarmacyi, nijakich patrabavańniaŭ da redakcyi z boku kaho‑niebudź nie pradjaŭlałasia, havorycca ŭ adkazie. Bolš za toje, mastackaje afarmleńnie da knihi rabiŭ mastak Andrej Savič, ź jakim jość damova № 488 ad 11.09.2007 h. Adpaviedna joj, aŭtar abaviazvajecca stvaryć i pieradać vydaviectvu dla vydańnia i pieravydańnia svoj tvor: mastackaje afarmleńnie i viorstku knihi «Mikoła Sielaščuk. Hučańnie muzyki niabiosaŭ». Punkt 10 damovy praduhledžvaje adkaznaść aŭtara za toje, što ŭzyčanaje im mastackaje afarmleńnie (aryhinał‑makiet) nie parušaje ničyich aŭtarskich pravoŭ.
U dadzienym vypadku cenzura adsutničaje, adnak možna vieści razmovu pra fakty parušeńnia inšych normaŭ prava, u pryvatnaści, aŭtarskich pravoŭ. U takim vypadku aŭtar, kali ličyć, što jaho pravy parušany, moža źviarnucca z adpaviednaj zajavaj u sud, reziumuje namieśnik ministra.
Staršynia Sajuzu mastakoŭ Uładzimier Savič paviedamiŭ «NN», što jahony syn Andrej Savič ničoha kamentavać z nahody atrymanaha PEN‑centram adkazu ź Ministerstva infarmacyi nia budzie.
«Čałaviek zrabiŭ dobruju spravu, ale ciapier usie havorać tolki pra toj zdymak», — adkazaŭ sp. Uładzimier.
Mastak Aleś Maračkin, jaki dziŭnym čynam źnik z hrupavoha zdymka ŭ knizie, pryśviečanaj Mikołu Sieleščuku, u svaju čarhu adznačyŭ:
«U adkazie ministerstva ni słova pra toje, što mianie źniavažyli, majho proźvišča tam uvohule niama. Zatoje jość Andrej Savič. U mianie składajecca ŭražańnie, što peŭnyja asoby sprabujuć uskłaści na jaho ŭsiu adkaznaść. A nakolki ja viedaju — nijakaj viny na im niama, jon pracavaŭ z hatovym materyjałam».
Fatohraf Uładzimier Šuba, aŭtar taho samaha zdymku, u sud pakul nie źbirajecca.
«Ja pakul jak śled nie razabraŭsia ŭ sytuacyi, mnie treba sustrecca z vydaŭcom, dyj knihi navat u rukach nie trymaŭ» — raspavioŭ sp. Šuba.
Na jaho dumku, pytańnie zachavańnia aŭtarskich pravoŭ u Biełarusi staić vielmi vostra. U sp. Šuby jość pytańni da vydaŭcoŭ šerahu knih, što vykarystali jaho zdymki biez paznačeńnia aŭtarstva:«Na knizie, pryśviečanaj Michasiu Ptašuku, jaho fotapartret majho aŭtarstva źmieščany na vokładcy, ale heta nijak nie paznačana».
