Zakonaprajekt ab pryvatyzacyi ŭrad adklikaŭ z Pałaty pradstaŭnikoŭ Nacyjanalnaha schodu Biełarusi, paviedamiła na bryfinhu 30 lipienia ŭ Minsku načalnik upraŭleńnia arhanizacyjnych form kiravańnia Ministerstva ekanomiki Łarysa Laŭkovič.
Nahadajem, zhodna z hetym zakonaprajektam pradstaŭniki dziaržavy mahli pryznačacca navat u tyja akcyjaniernyja tavarystvy, stvoranyja ŭ pracesie pryvatyzacyi, u jakich u dziaržavy niama doli. Mierkavałasia, što dziaržpradstaŭniki zmohuć prypyniać vykanańnie rašeńniaŭ ahulnaha schodu akcyjanieraŭ u vypadku, «kali realizacyja hetych rašeńniaŭ supiarečyć hramadskaj karyści i biaśpiecy, nanosić uron navakolnamu asiarodździu, parušaje pravy i zakonnyja intaresy inšych asob».
Zakonaprajekt ab pryvatyzacyi ŭ pieršym čytańni byŭ pryniaty nižniaj pałataj biełaruskaha parłamienta ŭ červieni 2013 hoda. Heta vyklikała šyroki rezanans.
Pradstaŭniki biźniesu i mižnarodnych finansavych arhanizacyj nieadnarazova źviartalisia va ŭrad, vykazvajučy zakłapočanaść zakonaprajektam, i prapanoŭvali nie prymać dakumient.
Tak, členy kansultacyjnaha savieta pa zamiežnych inviestycyjach pry Saviecie ministraŭ źviartalisia da premjer-ministra Biełarusi i dakazvali, što pryniaćcie zakonaprajekta admoŭna paŭpłyvaje na dziełavy klimat u krainie.
«Mahčymaść nakładańnia čynoŭnikami zabarony na šerah rašeńniaŭ akcyjaniernych tavarystvaŭ pa sutnaści aznačaje viartańnie da situacyi, anałahičnaj isnavańniu admienienaha jašče ŭ 2008 hodzie instytuta «załatoj akcyi», — havaryłasia ŭ liście, jaki kansultacyjny saviet nakiravaŭ va ŭrad.
U 2014 hodzie pradstaŭniki Dziaržkammajomaści zajavili, što ŭ suviazi z krytykaj z boku biźnies-supolnaści ŭ zakonaprajekt ab pryvatyzacyi płanujecca ŭnieści istotnyja źmieny.
