Žurnalistka brytanskaha telekanała Sky News Kici Łohan stała pryčynaj maštabnaj pierastrełki pamiž bajavikami «ŁNR» i ŭkrainskaj armijaj. Prynamsi heta vynikaje ź jaje pasta ŭ fejsbuku.
U paviedamleńni havorycca, što karespandent telekanała Sky News Kici Łohan prapanavała bajevikam «ŁNR» pastralać pa pazicyjach USU dla «vastryni siužetu».
U paćvierdžańnie hetamu ŭ hrupie «Akupavany Łuhanska» taksama apublikavany skrynšot pasta Łohan, u jakim jana apisvaje situacyju. U pryvatnaści, žurnalistka pryznajecca, što ŭžo doŭha biespaśpiachova šukaje mahčymaść zaśniać sieparatystaŭ «ŁNR» «u dziejańni». Tamu, kali vierchavod bajevikoŭ, bačačy jaje pakuty, prapanuje, kab jaho ludzi abstralali ŭkrainskija pazicyi dla jaje siužetu, jana, asabliva nie razdumvajučy, zhadžajecca.
Jak arhumient u svajo apraŭdańnie Łohan pryvodzić słovy zavadatara bajevikoŭ: «My ŭsio roŭna pavinny pa ich stralać, jany abstralali nas raniej».
Ale za abstrełam sieparatystaŭ, pa słovach žurnalistki, nastupiŭ ahoń u adkaz, i pačaŭsia maštabny boj, tak što Łohan i jaje kamandzie ledź atrymałasia schavacca.
U kancy pasta žurnalistka adznačaje, što zaraz adčuvaje siabie «krychu vinavataj» … Trochi?!
U vyniku Słužba biaśpieki Ukrainy anulavała akredytacyju brytanskaj žurnalistcy Sky news Kici Łohan i razhladaje pytańnie zabarony ŭjezdu joj va Ukrainu, paviedamlaje interfax.ua.
