Niekalki sotniaŭ žančyn pryniali ŭdzieł u toples-maršy pa vulicach kanadskaha horada Uoterłu.
Udzielnicy maršu nieśli płakaty «Heta hrudzi, a nie bomba» i «Nudzizm nie maje dačynieńnia da seksu».
Metaj mierapryjemstva jaho arhanizatary nazvali baraćbu za svabodu i hiendarnuju roŭnaść.
Padstavaj dla praviadzieńnia akcyi staŭ incydent, jaki adbyŭsia ŭ minułym miesiacy.
Palicyja spyniła troch siaścior, jakija jechali na rovarach toples. Siostry Tamira, Nadzia i Ališa Machamied patłumačyli svaje pavodziny tym, što ŭ toj dzień było vielmi horača.
Pa słovach dziaŭčat, palicyjanty paprasili ich prykryć hrudzi.
Zakony pravincyi Antarya, u jakoj heta adbyłosia, nie zabaraniajuć žančynam demanstravać aholenyja hrudzi.
U suviazi z hetym siostry paskardzilisia na palicejskich. Tyja ŭ svaju čarhu zajavili, što nibyta prosta praviarali stan rovaraŭ, na jakich jechali dziaŭčaty.
«Ja ŭjavić sabie nie mahła, što hetaja tema vykliča takija sprečki. Nie dumała, što ludziej mohuć tak ŭzrušyć žanočaja hrudzi», — skazała adna ź siaścior — viadomaja ŭ Kanadzie śpiavačka, jakaja vystupaje pad psieŭdanimam Ališa Bryła.
«My prosta chacieli abaranicca, raspavieści ludziam, što jany majuć takoje prava», — dadała jana.
Zakon, jaki abaraniaje prava žančyn chadzić z adkrytymi hrudźmi, źjaviŭsia ŭ Antarya ŭ 1996 hodzie paśla taho, jak Apielacyjny sud pravincyi ŭstaŭ na abaronu žančyny, jakuju abvinavacili ŭ źjaŭleńni toples na publicy. Jana była aštrafavanaja ŭ 1991 hodzie, ale sud pastanaviŭ, što ŭ jaje pavodzinach nie było ničoha «haniebnaha albo nienaturalnaha».
