«Dačka» nacyjanalnaha naftatrejdara «Biełaruskaja naftavaja kampanija» — «BNK-Ukraina» — pa vynikach pieršaha paŭhodździa ŭvajšła ŭ trojku najbujniejšych pradaŭcoŭ paliva na ŭkrainskim rynku. Praŭda, z-za hłabalnaha padzieńnia cenaŭ na vuhlevadarody dachodnaść pastavak pamienšyłasia ŭ dva razy.
Pavodle źviestak ukrainskaha śpiecyjalizavanaha resursu OilNews, pa vynikach pieršaha paŭhodździa «BNK-Ukraina» zaniała treciaje miesca ŭ rejtynhu imparcioraŭ bienzinu i dyzpaliva va Ŭkrainu z abjomam 205,5 tys. ton. Pry hetym, jak adznačajuć daśledčyki, hety vynik moža być niapoŭnym, pakolki «BNK-Ukraina» źjaŭlajecca pastaŭščykom dla niekatorych inšych apierataraŭ. Naprykład, dla kampanii «Ukrpaletsistem», jakaja źjaŭlajecca stratehičnym partnioram biełarusaŭ u raźvićci sietki AZS.
U sakaviku i červieni biahučaha hoda «BNK-Ukraina» arandavała ŭ «Ukrpaletsistiem» dźvie zapraŭki ŭ Lvoŭskaj i Kiravahradskaj abłaściach i pradaje na ich paliva pad brendam «Biełaruskaja naftavaja kampanija».
U paraŭnańni z pačatkam hoda «BNK-Ukraina» vycieśniła ź pieršaj trojki hrupu «Pryvat» (165,8 tys. Ton), jakaja źjaŭlajecca biźniesam eks-kiraŭnika Dnieprapiatroŭskaj vobłaści Ihara Kołomojskoho.
Lidarami zastajucca dźvie najbujniejšyja razdrobnyja naftahandlovyja kampanii WOG (559,8 tys. ton) i OKKO (417,9 tys. ton). Da pieršaj trojki nabliziłasia «Rasnafta» z abjomam pastavak u pieršym paŭhodździ 203,8 tys. ton.
Pavodle źviestak Biełstata, u studzieni-mai ŭ Ukrainu było pastaŭlena paliva na sumu 645,9 młn dalaraŭ. Heta składaje tolki 48,6% da anałahičnaha pieryjadu minułaha hoda. Asnoŭnyja pryčyny — źnižeńnie cenaŭ na naftu i jaje vytvornyja. Taksama adbiłasia i skaračeńnie pastavak (amal na 20%) u fizičnym abjomie.
Najbujniejšym kupcom biełaruskaha paliva zastajecca Vialikabrytanija. Na druhim miescy — Niderłandy. Paliva na hetych rynkach nie pradajecca, prosta jano prachodzić praz kampanii z hetych krain.
