Chołdynh UDTRK (Usierasijskaja dziaržaŭnaja televizijnaja i radyjoviaščalnaja kampanija) stvaryŭ śpiecyjalnuju słužbu pa baraćbie z fejkami. Pra heta ŭ chodzie panelnaj dyskusii na maładziožnym forumie «Terytoryja sensaŭ na Klaźmie» paviedamiŭ palityčny ahladalnik UDTRK i viadučy prahramy «Vieści a 20-j» na kanale «Rasija-1» Andrej Kandrašoŭ.
Videazapis dyskusii była raźmieščany na kanale forumu ŭ YouTube.
Pra padraździaleńnie, jakoje pieraškadžaje dezinfarmacyi, viadučy raspavioŭ, adkazvajučy na pytańnie rabotnika adnaho z kanałaŭ Leninhradskaj vobłaści, ci mohuć fiederalnyja ŚMI kazać niapraŭdu ludziam, jakija im daviarajuć. U prykład małady čałaviek pryvioŭ fejk, pakazany ŭ prahramie «Śpiecyjalny karespandent». U siužecie havorka išła pra dziciačuju adukacyju ŭ Narviehii. Jaho aŭtar Jaŭhien Papoŭ śćviardžaŭ, što narviežskija dzieci vielmi rana daviedvajucca pra homaseksualizm. Tekst paćviardžaŭsia kadrami pakoja, ableplenaha vyjavami aholenych mužčyn. Paźniej vyśvietliłasia, što pakazany ŭ efiry rolik — padrobka. U aryhinale na ścianie pakoja była vialikaja nalepka džypa.
Na heta Kandrašoŭ adkazaŭ, što «fiederalnyja ŚMI abaviazanyja kazać praŭdu svajmu hledaču». Jon taksama rastłumačyŭ, što kamanda, jakaja padrychtavała repartaž, nie datyčnaja da stvareńnia videa: redaktary, jakija dapamahali Papovu źbirać materyjał, pryniali za čystuju manietu užo hatovy fejk ź sietki. Pa słovach Kandrašova, aŭtar paprasiŭ prabačeńnia pierad hledačami za prademanstravanuju padrobku.
