Telesyhnał ź mienskaj Katedry praz spadarožnikavuju suviaź budzie pieradavacca ŭ Vatykan. Na vosiem plazmavych ekranaŭ u Katedry i na vialiki ekran na placy pierad joj budzie padavacca syhnał, atrymany z Vatykanu. U Miensku budzie pracavać piać telekamer. Buduć arhanizavany synchronny pierakład ź italjanskaj, anhielskaj, partuhalskaj, hišpanskaj, francuskaj movaŭ.
Telemost pačniecca a 18‑j pavodle mienskaha času ŭračystym uniasieńniem kryža ŭ zalu Paŭła VI u Vatykanie. Pieršym horadam‑udzielnikam telemostu stanie Taleda. Maładyja ludzi z Hišpanii pračytajuć uryvak sa Śviatoha Piśma j raspaviaduć ab svaim šlachu viery. Zatym nastupić čarha Aparesidy (Brazylija), adkul budzie pračytany ŭryvak z apošniaj encykliki Benedykta XVI «Zbaŭlenyja praz nadzieju» i prahučyć asabistaje śviedčańnie adnaho sa studentaŭ. Trecim horadam stanie Locha ŭ Ekvadory. U 18.55 u zalu prybudzie Benedykt XVI, jaki prymie pa čarzie pryvitańni kožnaj z krainaŭ, złučanych telemostam: z Taleda, Aparesidy, Lochi, Neapalu, Havany, Mechika, Avińjonu, Vašynhtonu, Bucharestu j Miensku.
Paśla pryvitańnia Papy arcybiskup Mienska‑Mahiloŭski Tadevuš Kandrusievič raspačnie ŭspamin daroŭ Śviatoha Duchu. Budzie zapalenaja adna ź siami śviečak, raźmieščanych kala ałtara, i adnačasova pieršaja śviečka zapalicca ŭ krainach‑udzielnicach. Zatym adbudziecca malitva Ružanca. Budzie čytacca adna z čatyroch častak — Chvalebnaja — pa čarzie studentami z Havany, Neapalu, Mechika, Avińjonu j Vašynhtonu. Kulminacyjaj telemostu stanie ŭručeńnie Śviatym Ajcom encykliki. Toje ž zrobić Mitrapalit Kandrusievič u Miensku: uručyć teksty encykliki maładym ludziam. Paśla telemostu moładź zastaniecca ŭ Katedry na ŭsiu noč ŭ malitoŭnym čujnavańni.